‘Wage Hike’ Supportado sa Konseho

Gisuportahan sa Cebu City Council ang tinguha sa Associated Labor Unions-Trade Union Congress of the Philippines (ALU-TUCP) nga modemanda og laing usbaw sa suholan sa mga mamumuo dinhi sa Sugbo ug ubang bahin sa reheyon-7.

Si Konsehal Sisinio Andales, tsirman sa Committee on Labor and Employment sa Konseho sa Dakbayan, miduso og resolusyon nga nag-awhag og suporta sa lakang sa ALU-TUCP ug gisuportahan kini sa tanang konsehal.

Ang tinguha sa ALU-TUCP nga moduso og awhag ngadto sa Regional Tripartite Wages and Productivity Board (RTWPB) sa laing usbaw sa inadlaw nga suholan sa mga mamumuo nagumikan sa pagsaka na pag-ayo sa presyo sa palaliton pagka karon.

Nabantayan nga ang kantidad sa matag kilo sa bugas misulbong pag-ayo sa milabay’ng mga semana ug ang gituohan nga hinungdan mao ang sunod-sunod nga pagsaka sa kantidad sa gasolina.

Matud ni Andales nga tukma lang nga suportahan ang demanda sa ALU-TUCP aron makatabang kini pagsulbad sa problema karon sa katawhan.

Tungod sa pagsaka sa kantidad sa mga petroleum products misangpot usab kini sa pag-usbaw sa presyo sa mga palaliton, ilabi na ang mga nag-unang panginahanglanon sa panimalay.

Gani tungod sa pagsulbong pag-ayo sa kantidad sa gasolina aduna na’y hugon-hugon nga ang mga transport groups modemanda usab og umento sa pletehan.