Rama Moatras sa LCP

Dili na modayon si Mayor Michael Rama sa iyang tinguha nga molansar pagka presidente sa League of Cities in the Philippines (LCP) kay nakasiguro siya nga pilde na siya’ng daan.

Ang rason ngano nga moatras na lang si Rama sa iyang plano mao nga ang Partido Liberal mopadagan og iyang kandidato pagka presidente sa kahugpongan sa mga city mayor.

Sigun sa kasayuran nga si Presidente Aquino mosuporta sa tinguha ni Quezon City Mayor Herbert Bautista nga maoy kandidato sa Partido Liberal.

Matud ni Rama nga iyang natan-aw nga daghan kaayo ang mga city mayor nga alyado sa Partido Liberal samtang gamay ra ang dumadapig sa United Nationalist Alliance (UNA).

Gusto unta ni Rama nga makakuha siya sa suporta nila ni Presidente Aquino ug Vice President Jejomar Binay aron masiguro gayud ang iyang kadaugan.

Si Rama miadto gayud sa Manila kaniadtong Biyernes og nakigtagbo siya ni Quezon City Mayor Bautista diin giingnan siya sa mayor sa Capital City sa nasud nga siya maoy posible nga suportahan ni Presidente Aquino.

Nalantaw ni Rama nga kon mopadayon siya sa iyang plano maangkon ra niya ang kapildehan.

Matud ni Rama nga gusto unta siya nga mahimong presidente sa mga city mayors kay isip presidente sa league paminawon gayud ang iyang tingog sa kadagkoan sa nasud kabahin sa mga isyu.