Dakung Lantugi sa Konseho Ugma

Daku nga lantugi ang nagpaabot atul sa sesyon sa mga konsehal sa dakbayan sa Sugbo ugma sa buntag nga Miyerkoles kon hisgutan na pagbalik ang pagpili og mga opisyal sa lainlaing komitiba sa Cebu City Council.

Sanglit wala pa maaprobahi ang han-ay sa mga inandam na mga ngalan nga mao unta ang molangkob sa 24 ka komitiba sa konseho ipadayon kini pagdiskutir atul sa sesyon.

Ang mga sakop sa City Council Secretariat misukip na sa mao nga hisgutanan diha sa “calendar of activities” sa ikaduha nga sesyon sa mga sakop sa 13th City Council nga gipangulohan na ni Vice Mayor Edgardo Labella.

Sa miaging inaugural sesyon, gikwestyon ni Konsehal Maryann Delos Santos ang pagbasa ni Konsehal Margarita “Margot” Osmeña sa mga ngalan sa mga konsehal nga naglangkob sa mga chairman, vice chairman ug mga sakop sa matag komitiba.

Matud ni Delos Santos nga gibutang sa agenda sa miaging inaugural session nga dunay pagahimoong eleksyon sa mga opisyal sa City Council ug sa mga sakop sa 24 ka lainlaing komitiba.

Si Delos Santos nagkanayon nga atul sa inaugural session walay gihimo nga eleksyon kon dili igo lang gibasa ni Konsehal Osmeña ang mga ngalan sa naglangkob sa matag komitiba diin siya ug si Konsehal Dave Tumulak, pulos mga alyado sa Team Rama, wala hatagi og komitiba.

Apan si Konsehal Margot Osmeña nagkanayon nga naandan na nga ang election sa mga konsehal nga molangkob sa mga komitiba sa konseho adto ra nila himoa sa caucus aron dili makapalangay sa proceedings kon anha kini himoa sa regular session.

Nahibaw-an nga si Konsehal Delos Santos gusto unta nga modumala sa Committee on Health apan ang komitiba gitugyan kini ngadto kang Konsehal Lea Japson.

Si Delos Santos hinoon bisan wala hatagi og komitiba, siya ang gitudlo nga minority floor leader kay upat ra man ka konsehal nga alyado sa Team Rama ang anaa sa konseho ug 12 ang sakop sa Bando Osmeña Pundok-Kauswagan (BOPK).