‘Warwick Market’ Problema sa Dakbayan

Ang Warwick Barracks Market nga gipatung-an sa Freedom Park ug Carbon Market Unit-1 maoy numero uno nga problema sa Cebu City Market Office.

Bisan og gibalik-balik ni Mayor Michael Rama nga gusto niya nga palamboon ang Warwick Barracks Market ang iyang mga sinaligan nakapanglingo-lingo nga naghuna-huna.

Ang MetroCebuNews misuway paghimo’g kinaugalingon nga pakisusi sa mao nga lugar og nasuta nga dili na merkado ang mao nga lugar kay gipuy-an na og mga tawo.

Si Market Administrator Raquel Arce mitug-an nga wala na sila mangolekta og arkabala ug ubang market fees sa mga nag-ukopar sa sulod nga bahin sa Warwick Barracks Market.

Ang ilang gikolektahan kadto na lang anaa naninda daplin sa karsada kay ang tunga-tunga nga bahin gihimo na nga panimalay ug dili na tindahan.

Basi sa rekord sa Market Operations Division, ang Warwick Barracks Market maoy labing minus og koleksyon kon itandi sa ubang kamerkadohan dinhi sa dakbayan.

Ang koleksyon sa market fees gikan sa Warwick Barracks Market kaniadtong 2010 miabot lang og P658,147, unya mikunhod kini ngadto sa P558,488 pagka 2011 og misaka’g balik sa P594,232 sa miaging tuig.

Kadto tua miukopar sa sulod sa Warwick Barracks dili na mamayad kay kuno sila wala maninda.

Gikareport pa nga daghang mga illegal nga kalihukan nga gipasiugdahan sa mga nagpuyo sa mao nga lugar sama sa video karera ug bisan ang pagpamaligya’g shabu.