Daku nga Budget Sa Sunod Tuig

Klaro na kaayo nga daku gihapon nga budget ang iduso ni Mayor Michael Rama ngadto sa Cebu City Council tungod kay ang tanang mga department heads sa City Hall misugyot og dagku nga budget para sa sunod tuig.

Karong tuiga, P5.3 Bilyones ang giaprobahan nga budget alang sa dakbayan sa Sugbo. Wala aprobahi sa Konseho ang gisugyot sa mayor nga P6.7 Bilyones tungod kay nagtoo ang mga konsehal nga dili makolekta ang maong kantidad.

Ang mga department heads nga miatubang sa mga City Hall reporters aron sa pagpadayag sa ilang mga plano ug programa unya sa sunod tuig mibutyag nga padak-an pa nila ang budget nga ilang pangayoon.

Si City Agriculturist Julito Baclayon miingon nga ang iyang departamento mangayo og P51 milyones nga budget para sa 2014 kay isugyot niya ang pagtugot og City Agriculture Department (CAD) office adto sa Barangay Taptap.

Gawas niini mosugyot pa gayud si Baclayon nga mo-hire og dugang 10 ka technical personnel, nagpasabot nga mga agriculturist nga maoy mogiya sa mga mag-uuma unsaon nga molambo ang ilang abut sa kaumahan.

Kaniadtong milabay’ng adlaw, sila si Cebu City Medical Center (CCMC) chief Gloria Duterte ug City Health Officer Stella Ygoña mibutyag usab nga mangayo sila og daku nga budget.

Si Duterte miingon nga mangayo siya og P549 milyones nga budget samtang si Ygoña mangayo usab og mga P300 milyones nga gahin.

Ang CCMC pagka karon aduna lay budget nga P364 milyones samtang P196 milyones sa City Health.