Rama Dili Motugot Yatakan sa CPA ang Katungod sa Dakbayan

Dili pa sigurado kon tagdon ba ni Mayor Michael Rama ang mga opisyal sa Cebu Port Authority (CPA) kon makigtagbo kini kaniya aron pagahisgutan ang kontrobersyal nga luna palibot sa karaang Compania Maritima building.

Gusto nga ipasabot sa mga opisyal sa CPA ngadto sa mayor nga tinguha nila nga i-develop ang palibot sa Compania Maritima building apan si Rama miingon nga dili siya mosugot nga himoon kini sa CPA nga dili molukat og permit gikan sa Office of the Building Official (OBO).

Gawas nga gipaguba ni Mayor Rama ang koral nga gitukod sa CPA nga walay permit, gusto pa niya nga protehean ang katungod sa dakbayan sa Sugbo.

Gimandoan ni Rama sila si City Administrator Jose Marie Poblete ug City Attorney Gerone Castillo nga dalion ang pagpagawas og mga sugyot kun unsay tukma nga buhaton batok sa CPA.

Matud pa, ang CPA wala motahod sa katungod sa dakbayan sa Sugbo bisan og gipahibalo sila nga ang pagtukod og koral palibot sa property nga ilang giangkon dili mahimo kun walay permit sa OBO.

Si Rama miingon nga dili siya motugot nga yatakan lang sa mga opisyal sa CPA ang katungod sa dakbayan. Matud ni Rama nga basi sa balaud ang CPA kinahanglan gyud nga mokuha og permit sa OBO kun magtukod sila og koral.

Apan si Atty. Yusop Uckung nga abogado sa CPA miingon nga  aduna sa’y balaud nga naglatid nga sila dili na kinahanglan nga mokuha’g permit kun magtukod sila’g proyekto sulod sa ilang property.

Ang tulo ka parsela nga yuta nga anaa mahimutang tupad sa karaang building sa Compania Maritima walay mga titulo nga nagpakita nga iya kini sa CPA.

Si Rama gusto nga gamiton ang maong luna isip ‘extension parking area’ sa mga sakyanan sa mga tawo nga moanha sa City Hall apan gibabagan sa CPA.