Konsehal sa Team Rama Dismayado

Nadismaya pag-ayo si Konsehal Mary Ann delos Santos nga siya ug si Konsehal Dave Tumulak nga mga alyado sa Team Rama wala gayud hatagi og katungdanan sa 22 ka komitiba sa Cebu City Council.

Sa upat ka konsehal nga alyado ni Mayor Michael Rama diha sa Konseho, bugtong si Konsehal James Cuenco ra maoy gitugyanan pagka tsirman sa Committee on Tourism.

Ang laing alyado sa Team Rama nga si Konsehal Nendell Hanz Abella gihimo lang ordinaryo nga sakop sa committee on education nga gipangulohan ni Konsehal Noel Wenceslao.

Ang 23 ka lainlaing komitiba sa konseho gipangulohan sa mga alyado sa Bando Osmeña Pundok-Kauswagan (BOPK). Nagbagolbol si Konsehal Delos Santos kay matud niya walay eleksyon nga gihimo kagahapon atul sa ilang inaugural session.

Apan si Konsehal Gerardo Carillo nga alyado sa BOPK mipasabot nga ang sagad himoon sa mga konsehal mao ang pagpahigayon og caucus diin adto nila hukman kon kinsa ang tugyanan sa lainlaing komitiba.

Gipasabot ni Carillo nga kon ang eleksyon anha nila himoa sa inaugural session mahimong molungtad kini’g dugay. Si Mayor Rama wala na kaayo mohatag og igo nga gibug-aton sa mao nga wala paghatag og katungdanan sa mga konsehal nga iyang alyado.

Bisan si Vice Mayor Edgar Labella mipasabot nga sa demokrasya nga kagamhanan ang “majority” mao gayud ang matuman apan hinoon angay gihapon nga paminawon ang “minority.”

Si Mayor Rama hinoon mipahibalo nga dunay mga konsehal nga hatagan niya og “executive function” sama sa pagsuperbisar sa mga departments sa City Hall.

Wala hinoon moklaro si Rama kon apil ba niya nga hatagan og executive function ang mga konsehal nga alyado sa Bando Osmeña Pundok-Kauswagan.