Rama: Minus ang Korapsyun Itandi sa Milabay nga Tuig

Si Mayor Michael Rama miingon nga dili siya corrupt nga pagka mayor apan bisan pa niini dili gihapon siya makapaneguro nga iyang masumpo sa hingpit ang corruption sa kagamhanan sa dakbayan.

Matud ni Rama nga bisan og dili hingpit nga masumpo ang corruption sa kagamhanan sa dakbayan apan iyang gibana-bana nga mominus kini kon itandi sa nangaging katuigan.

Ang usa sa makaagni nga mapugos pagkuot og suborno ang usa ka magbubuhis nga mo-transact og business sa City Hall aron ihatag sa mga corrupt nga kawani mao ang pagtuyo sa paglangay-langay sa pag-asikaso sa ilang papeles.

Atul sa kanhi administrasyon, adunay mga kawani sa City Hall nga nadakpan sa akto nga midawat og kwarta nga gidemanda niya gikan sa usa ka magbubuhis.

Matud sa mayor nga kon adunay igong ebidensya, dili siya magpanuko sa pagpalagpot gikan sa serbisyo niining mga kawani sa City Hall nga nalambigit og binuang.

Pagka karon ang mga department head sa City Hall ingon man ang team nga gitahasan ni Mayor Rama padayon pa sa paghashas sa listahan aron ilhon kinsa kadtong dili na patrabahoon sugod Hulyo 1.

Iyang gipahibalo nga kon mahuman na ang paghashas sa listahan, kapin sa duha ka libo sa 3,298 ka kawani nga kaswal sa dakbayan ang matangtang apan sa anam-anam nga paagi.