Batakang Serbisyo Dalhon sa mga Sugbuanon: Mayor Rama

Kabahin sa mission sa pangobiyerno ni Relected Cebu City Mayor Michael Lopez Rama mao ang pagdala sa batakang serbisyo ngadto sa ganghaan o kaugalingong tugkaran sa mga Sugbuanon.

Agig pag tuman niini, gimandoan ni Mayor Rama ang Frontline Cluster Services sa city hall sa pagpahigayon ug senemana nga community outreach nga mas nailha\ng ‘City Hall at Your Doorstep,’ kon Piyesta sa Pagpangalagad, diin matag adlawng Biyernes dalhon ang mga serbisyo sa 22 ka mga departamento sa city hall ngadto sa mga kabarangayan niining dakbayan.

Karong umaabot Biyernes, Hunyo 14, 2013 ang City Hall at Your Doorstep ipahigayon ngadto sa Barangay Cogon Ramos. Sugdan kini ug usa ka Santos nga Misa sa alas-9 sa buntag dayon sundan kini sa pormal nga pag-abli sa Piyesta sa Pagpangalagad hangtod sa alas-2 sa hapon.

Kahinumduman nga miabot ug gatosan ngadto sa liboan ka mga lumulopyo kada barangay ang naka benepisyo ning libreng mga batakang pagpangalagad nga gidala sa maong outreach program.

Ang maong programa nagahatag ug batakang panerbisyo sa katawhan sama sa libreng kosultasyon sa rehisro sa pagkatawo, pagpakasal, ug pagkamatay; libreng tuli alang sa mga kabataan; libreng medikal nga konsultasyon, ug pag-ibot sa ngipon; pagpang limpyo sa mga kanal ug drainage; pagpanaod ug pagpang-ayo sa mga street lights; libreng rehistro, kapon ug bakuna sa mga iro ug iring; libreng laboratory services sama sa bloodtyping ug blood sugar testing; libreng feeding ug timbang sa mga kabataan; libreng pagpanghatag ug mga seedlings ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, traffic rules, mga kalambuan sa dakbayan, ug uban pa.

Giawhag usab ang tanan lakip na ang mga lumulupyo sa mga kasilinganang barangay sa Barangay Cogon Ramos sa pagpahimulos sa maong higayon, aron dili na sila mahasol, makagasto ug mahago pa sa pag-adto sa city hall. (By Greggy Jiggs P. Senados, PIO Staff)