Pag-IBIG Fund Housing Loan Mas Dali na ang Proseso

Ang proseso sa housing loan application sa Pag-IBIG Fund dali na lang ug ma aprubahan dayon sulod sa 17 ka adlaw gikan sa pag sumiti sa kumpletong requirements, ug ma release sulod sa 3 ka adlaw ang kantidad sa loan human sa himoong post-approval compliance.

Ang Pag-IBIG Fund mipahibalo nga gi himo na lang ug 20 ka adlaw gikan sa 27 ang pag proseso sa housing loans.

Kini nga kalamboan gipatuman subay sa mando sa bag-ong administrasyon nga himoong sayon ug dali ang pag proseso sa mga transaksyon sa gobyerno matud ni Pag-IBIG Fund President and Chief Executive Officer Atty. Darlene Marie B. Berberabe.

Subay niini ang Pag-IBIG Fund mibukas sa End-User Financing (EUF) program nga mopahulam sa kwalipikadong miyembro ngadto na sa kantidad nga PhP 6 million alang sa pag renovate o pagtukod ug bag-ong balay ug laing sistema nga Affordable Housing Program (AHP) alang lamang sa minimum-wage earners. Matud ni Berberabe ang interest rate gipamub-an sa 5.5% per annum alang EUF ug 4.5% sa AHP.

Ang usa ka miyembro mahimo nga mo aplay ug “multiple loans” kung eligible kini. Ang 5.5% interest rate ipatuman alang sa usa ka tuig nga “repricing period” samtang ang 4.5% sa affordable housing program gi subsidized sa 10 ka tuig.

Ang pag proseso sa insurance claims sa housing loan borrowers nga kaniadto 30 ka adlaw gihimo na lang nga usa ka adlaw. Pinaagi niining mga bag-ong kalamboan sa housing loan features, nag awhag si Berberabe sa mga Pag-IBIG members nga mopahimulos na karon sa Pag-IBIG housing loans. (lpp/PIA7/Negros Oriental)