Pasangil sa Pagpamalit og Botos, Gisaway ni Rama

Gisaway ni Mayor Michael Rama ang iyang kontra sa politika nga si Kongresista Tomas R. Osmeña tungod sa pagpasangil nga namalit og mga botos ang Team Rama hinungdan nga midaug siya ug si Konsehal Edgardo Labella sa miaging eleksyon.

Matud ni Rama nga dili katoohan nga siya makagasto pagpamalit og mga botos sa mga botante aron lang siya botohan pagka mayor kay dili siya adunahan.

Si Rama miingon nga ang iyang kaatbang maoy gidungog nga milyonaryo og maoy makahimo sa pagpamalit og mga botos. Matud ni Rama nga nakadungog siya nga dunay mga botante nga gipalit ang botos sa tag P500 ug adunay P1,000 mao nga lisud ang Team Rama nga mapasanginlan kay wala sila’y kwarta.

Apan si Osmeña nagkanayon nga ang katawhan maoy mas nasayod. Giangkon ni Rama nga wala gayud siya malipay pagkasayod nga mipasaka og election protest sila si Osmeña ug Vice Mayor Joy Augustus Young nga parehong napilde sa miaging eleksyon.

Matud ni Rama nga nagtoo siya nga isip mga beterano nga politiko makadawat na sila si Osmeña ug Young sa kapildehan kon dili sila pilion sa katawhan.

Apan matud ni Osmeña nga ang pagpasaka nila og election protest batok nila ni Rama ug Vice Mayor-Elect Edgardo Labella maoy paghagit kanila nga imatuod nga midaug sila sa eleksyon sa tinarung nga paagi.

Ang resulta sa iphanay sa mga botos, si Rama nakakuha og kapin sa 6,000 nga labaw kang Osmeña samtang si Young gibiyaan lang og 184 botos ni Labella.

Matud ni Rama nga kon aduna may gipanghatagan og tag P100 ka pesos suhol kadto kanila isip mga canvassers ug watchers atul sa adlaw sa eleksyon.