PNP, Nangayo Og Tabang Sa Publiko Sa Ipatuman Nga Liquor Ban Sa Eleksyon

Nanawagan og tabang sa publiko ang Philippine National Police (PNP) alang sa pagpatuman sa duha ka adlaw nga liquor ban sa umaabot nga piniliay.

Matud pa sa tigpamaba sa PNP nga si C/Supt. Wilben Mayor, mahimong kuhaan og hulagway ang mga molapas sa liquor ban nga ipatuman sugod bisperas sa eleksyon sa Mayo 8 hangtud sa mismong adlaw sa piniliay sa Mayo 9.

Giingong mas maayo nga i-post sa social media ang mga makuha nga hulagway ug ipadala sa account sa PNP aron mahimuan sa tukmang aksyon.

Pahinumdom pa sa nasudnong polisya, bawal ang mag-inom sa kalsada o bisan asang pampublikong lugar ug bawal usab mopalit ug magbaligya og bisan unsang bino sa panahon sa liquor ban.

Dili usab mahimong moadto sa lugar sa botaranan ang mga nakainom og bino.

Giseguro sa PNP nga may mga polis nga magpatrolya aron hugot nga ipatuman ang liquor ban sa tibuok nasod. (ecb/PIA7-Bohol)