Mga Molupyo Sa Barangay Tisa Nagpiyesta!

Liboan ka mga residente sa Barangay Tisa ang nagpiyesta sa mga libreng serbisyo atol sa ‘Piyesta sa Pagpangalagad’ kon ‘City Hall at Your Doorstep’ didto sa Sitio Santo Niño Riva Ridge gymnasium karong adlawa, Marso 30, 2016 Miyerkules.

Atol sa pakighinabi sa BARUGG News gipaambit ni Lucia Gimena, 65 ang edad, usa lamang sa natabangan sa programa nga, “Nalipay ug nagpasalamat gyod mi ni Mayor Mike Rama kay naka-avail mi sa mga services nga dili na mahasol ug pag-adto pa sa Cebu City Hall. Dako gyod ni ug tabang sa katawhan labi na sa mga kabos.”

“Happy lang mi nga natabangan ug dako kaayo ni ug advantage ug benefits sa katawhan ang programa ni Mayor Rama kay daghan baya ang naglisod karon,” asoy usab ni Paul Campilan, 63 ang edad kinsa nagpabakuna ug anti-rabies sa iyang iro.

Atol sa kalihokan wala usab sipyata ni Barangay Tisa Kapitan ug Association of Barangay Council President Philip Zafra ang pagpakita sa iyang presensiya ug hugot nga suporta alang sa naasoyng programa.

Sa iyang mensahe gipasalamatan ni Zafra si Mayor Rama ug Besi Mayor Edgardo Labella lakip na ang mga kawani sa kagamhanan ning dakbayan sa mga programa, proyekto ug serbisyo nga mibaha sa Barangay Tisa.

Ang maong barangay adunay 40,020 ka mga residente nga nagpuyo sa 68 ka mga Sityo niini. Hugot usab ang suporta sa mga opisyales ug kawani sa naasoyng barangay alang sa kalampusan sa kalihokan.

Samtang ang maong programa inisyatiba ni Mayor Rama diin ang batakang serbisyo sa nagkalain-laing departamento sa kagamhanan ning dakbayan dalhon ngadto sa mga katawhan sa 80 ka Barangay nga naglangkob ning syudad.

Ang mga gipiyestahan nga mga serbisyo naglangkob sa pagpang-ibot og ngipon; paghatag og libreng medisina; pag-ayo sa mga gripo; pagpangtaod ug pag-ayo sa mga suga; pagrehistro, bakuna og kapon sa mga iro, iring og mga kahayopan; screening sa job-fair og referral; pagpangtupi sa buhok; paghinlo sa mga drainage og kanal; og paghatag og mga impormasyon kabahin sa fire safety, traffic, road safety, kalihokan sa dakbayan, drug awareness, urban poor, libreng feeding, og uban pa.

Nahuman ang piyesta sa libreng mga serbisyo hangtod na nga naserbisyohan ang tanan nga misalmot niini. (Cebu City Public Information Office PIO/Greggy Jiggs P. Senados)