City Hall At Your Doorstep At Sitio Manggahan, Barangay Guadalupe

Liboan ka mga molupyo sa Sitio Manggahan, usa sa 84 ka mga Sitios sa Barangay Guadalupe ning syudad ang natabangan sa mga libreng serbisyo nga alang sa tanan karong adlawa Marso 29, 2016 Martes pinaagi sa ”City Hall At Your Doorstep” kon “Piyesta sa Pagpangalagad”.

Ang programa inisyatiba ni Cebu City Mayor Michael Lopez Rama nga natukod niadtong tuig 2010 diin ang 22 ka mga departamento sa City Hall maghatod sa mga libreng serbisyo ngadto paduol sa mga katawhan ngadto usab sa ilang tagsa-tagsa ka mga barangay.

Ang maong programa nagahatag ug libreng batakang panerbisyo alang sa tanan sama sa konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pag-ibot sa ngipon; pagpanglimpyo sa mga kanal ug drainage; pagpanaod ug pagpang-ayo sa mga street lights; ug pagrehistro, kapon ug bakuna sa mga iro ug iring.

Gitanyag usab ang mga batakang serbisyo nga mao ang laboratory services sama sa blood typing ug blood sugar testing; pagpanghatag ug mga seedlings nga itanumay sama sa prutas ug utanon; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, road safety ug traffic rules, environmental awareness, fire prevention, mga kalihokan ug kalambuan sa dakbayan, ug uban pa.

Atol sa kalihokan mipakita sa ilang suporta ang pipila ka mga kawani ug usa ka Konsehal sa Barangay Guadalupe nga si Vin Montecillo kinsa mipasalamat kang Mayor Rama ug sa tanang mga empleyado sa Cebu City Government sa paghatag ug libreng serbisyo sa katawhan.

Atol usab sa pakighinabi sa BARUGG News, matud ni Lola Margarita Gabutan, usa lamang sa natabangan sa programa nga, “Maayo gyod ang gihimo ni Mayor Rama nga naglantaw siya sa kaayohan sa katawhan labi na sa mga kabos. Dako kayo ni ug tabang kay daghan ang naglisod karon ug dili maka-afford ug pacheck-up sa private doctors sa mga hospital, maayo ni kay libre na ang konsulta naa pay libreang tambal.”

Dugang pa, ang kalihokan gipahigayon na ka-usa sa usa ka adlaw aron malukop ang 80 ka barangays ning syudad ug matabangan ang mga Sugbuanon diha sa paghatag ug libreng serbisyo nga alang sa tanan. (Cebu City Public Information Office PIO/Greggy Jiggs P. Senados)