Pangabuso Sa Mga Kababayen-Ang Propesyonal Ubos Tungod Sa Paghilom

Nagpabiling ubos ang kaso sa mga pangabuso sa mga babaye nga edukada o propesyonal tungod sa di pagtug-an niini sa awtoridad.

Matod ni Rosemarie Salazar, ang focal person sa Women and Family Sector sa Department of Social Welfare and Development (DSWD7), nga daghan gihapon ang pangabuso ang natagamtam sa mga babaye nga propesyonal, edukada o anaa sa high income status sa komunidad.

“Apan sukwahi sa mga naa sa low income nga mga kababayen-an, kini sila dili mahibaloan tungod kay dili man sila mu report,” matod ni Salazar.

Ang dili nila pagdangop sa kapulisan o sa social welfare o bisan sa barangay tungod kay maulaw sila kay aduna silay reputasyon nga giampingan.

“Kasagaran ani nila muluom lang, kayahon lang gyud nila kay mas importante nila ang ilang dungog,” matod ni Salazar.

Tungod niini giawhag niya ang maong mga kababayen-an nga mugawas sa ilang nahimutangan tungod kay mahimo na unya kini nga dako nga problema.

Kun dili man sa ilang kaugalingon, matod ni Salazar nga muresulta unya kini og kadaot ngadto sa ubang sakop sa pamilya, labi na sa mga anak.

Nagpabiling daghan gihapon ang mga kababayen-an nga anaa sa low income ang nakasinati og mga pangabuso.

Kini naglangkob og abusing pisikal sama sa pagpanagmal, pagpangilata og abusong mental o emosyonal.

Kasagaran sa mga emosyonal nga pangabuso muhisgoot kabahin sa economic dependency o ang pagsalig sa abot sa bana o walay trabaho.

Ang Marso mao ang buwan sa kababayen-an.(fcc/PIA7-CEBU)