Flagdown Rate sa Taxi, P30 Na

(PIA) — Epektibo sa Marso 19, P30 na ang flagdown rate sa mga taxi units sa tibuok nasud gikan sa kanhi P40 ilabi na sa kaulohan.

Matud pa ni Land Transportation Franchise and Regulatory Board (LTFRB) Chairman Winston Ginez, ang sunod-sunod nga pagkunhod sa presyo sa mga produktong petrolyo ang hinungdan sa gihimong desisyon sa pagpa-ubos sa pletehan sa mga taxi units.

Apan dili apil sa maong fare cut ang Cordillera Administrative Region o CAR.

Ubos sa maong desisyon, P30.00 ang flagdown rate sa regular taxi gikan sa kanhi P40, P3.50 usab ang singil sa nagsunod nga unang 500 metros gikan sa matag 300 metros ug sa waiting time, P3.50 sa matag 90 segundo gikan sa kanhi 120 segundo.

Samtang sa mga airport taxi, P60 na ang flagdown gikan sa kanhi P70 ug P4 sa succeeding 500 metros ug P4 sa waiting time matag 90 segundo.

Gitakda sa LTFRB sa Abril 1 ang pagsugod sa pagpa-calibrate sa taxi alang sa bag-ong pletehan alang sa taxi unit nga may ending 2,4,9 ug sa Mayo sa may ending 5,7,0 ug sa Hunyo ang may ending 1,3,6 ug 8.

Gitataw usab ni Ginez nga nationwide ang flagdown rate rollback sa taxi epektibo Marso 19 bisan dili pa calibrated ang mga taxi units. (ecb/PIA7-Bohol)