Mga Lumulopyo Sa Barangay Calamba Nagpiyesta Sa Libreng Mga Serbisyo!

Liboan ka mga residente sa Barangay Calamba ang nagpiyesta sa mga libreng serbisyo atol sa ‘Piyesta sa Pagpangalagad’ kon ‘City Hall at Your Doorstep’ karong adlawa, marso 2, 2016 Miyerkules.

Ang magtiayong Matilde ug Warnesto Barellano uban sa ilang tulo ka mga apo, pipila lamang sa natabangan sa programa kinsa pulos nagpakonsulta sa doktor ug nahatagan usab ug libreng tambal ug bitamina.

Atol sa pakighinabi sa BARUGG News gipaambit sa duha nga, “Maayo ni ang gibuhat ni Mayor Rama kay mahuna-hunaon ug naglantaw siya sa kaayohan sa katawhan. Nagpasalamat gyod mi Sir nga natabangan mi mga Senior Citizens apil among mga apo.”

Asoy usab ni Barangay Calamba Kapitan Maria Yvonne Cania-Feliciano atol sa iyang welcome message nga, “Wala gyod ta pasagdi sa administrasyon ni Mayor Michael Rama maong nagpadayon ang serbisyo alang sa katawhan.”

Ang Barangay Calamba adunay kapinsa 16 Mil ka mga residente nga nagpuyo sa 16 ka mga Sityo niini. Hugot usab ang suporta sa mga opisyales ug kawani sa naasoyng barangay alang sa kalampusan sa kalihokan.

Samtang ang maong programa inisyatiba ni Mayor Michael Rama diin ang batakang serbisyo sa nagkalain-laing departamento sa kagamhanan ning dakbayan dalhon ngadto sa mga katawhan sa 80 ka Barangay nga naglangkob ning syudad.

Ang mga gipiyestahan nga mga serbisyo naglangkob sa pagpang-ibot og ngipon; paghatag og libreng medisina; pag-ayo sa mga gripo; pagpangtaod ug pag-ayo sa mga suga; paghatag og libreng seedlings nga itanumay; pagrehistro, bakuna og kapon sa mga iro, iring og mga kahayopan; screening sa job-fair og referral; pagpangtupi sa buhok; paghinlo sa mga drainage og kanal; og paghatag og mga impormasyon kabahin sa fire safety, traffic, kalihokan sa dakbayan, drug awareness, urban poor, legal nga tambag, libreng feeding, og uban pa.

Ang kalihokan gisugdan ug usa ka Santos nga Misa nga gipangulohan ni Father Eligio Suico gikan sa Virgen De Los Remedios Parish. Atol sa iyang wali gihmug-atan niini ang pagtinabangay sa gobiyerno ug sa mga katawhan sama sa pagpatuman ug pagsunod sa mga balaod sama pananglit sa paglabay sa basura, paghatag ug serbisyo, ug uban pa.

Nahuman ang piyesta sa libreng mga serbisyo hangtod na nga naserbisyohan ang tanan nga misalmot niini. (Cebu City Public Information Office PIO/Greggy Jiggs P. Senados)