Mga Lumulopyo Sa Sitio Camagong, Lahug Nagpiyesta Sa Libreng Mga Serbisyo

Liboan ka mga residente sa Sitio Camagong, Barangay Lahug ang nagpiyesta sa mga libreng serbisyo atol sa ‘Piyesta sa Pagpangalagad’ kon ‘City Hall at Your Doorstep’ karong adlawa, Pebrero 4, 2016 Huwebes.

Si Lola Teresita Menchavez, 67 anyos ug usa sa natabangan sa programa mibutyag sa dihang gikahinabi sa BARUGG News nga, “Daghan kaayong salamat kaninyo nga mitabang namong mga kabos. Nindot ni ang programa ni Mayor Rama kay pareha karon ingon ani wala mi kwarta pakonsulta sa doktor karon nalibre na, naa pay libreng tambal.”

“Dako gyod ni ug ikatabang namo kay lipay kaayo ang mga tawo nga natubag among mga problema nga dili na moadto pa sa Cebu City Hall kay kamo naman ang nagpaduol dinhi mismo sa among Sityo,” asoy usab ni Lola Esterlita Gapay, 62, kinsa nagkuha ug Cedula.

Ang maong programa inisyatiba ni Cebu City Mayor Michael Rama diin ang batakang serbisyo sa nagkalain-laing departamento sa kagamhanan ning dakbayan dalhon ngadto sa mga katawhan sa 80 ka Barangay nga naglangkob ning syudad .

Atol sa kalihokan wala usab sipyata ni Besi Mayor Edgardo Labella nga mao ang akting mayor karon sa pagtambong sa kalihokan. Gipasalamatan niini ang mga kawani sa Cebu City Government sa ilang way puas nga paghatod ug mga serbisyo ngadto direkta sa mga katawhan.

Samtanag ang mga gipiyestahan nga mga serbisyo naglangkob sa pagpang-ibot og ngipon; paghatag og libreng medisina; pag-isyu og cedula; pag-ayo sa mga gripo; pagpangtaod ug pag-ayo sa mga suga; paghatag og libreng seedlings nga itanumay; pagrehistro, bakuna og kapon sa mga iro, iring og mga kahayopan; screening sa job-fair og referral; pagpantupi sa buhok; paghinlo sa mga drainage og kanal; pag-isyu ug cedula; og paghatag og mga impormasyon kabahin sa fire safety, traffic, kalihokan sa dakbayan, drug awareness, urban poor, legal nga tambag, libreng feeding, og uban pa. (Cebu City Public Information Office PIO/Greggy Jiggs P. Senados)