Pagdawat sa 17 ka Nurse Imbestigaran sa Civil Service

Gisugdan na sa Civil Service Commission (CSC) ang pag-imbistigar sa giingong pagpatrabaho og 17 ka nurse sa mga opisyal sa dakbayan sa Sugbo nga wala subaya ang tukma nga lagda.

Si regional director Karin Litz Zerna sa Civil Service Commission mihatag og kamandoan sa hepe sa CSC-Cebu South Field Office nga maoy mopahigayon og imbistigasyon sa reklamo ni Konsehal Margarita Osmeña.

Iyang gimandoan si director Nissi Cherith Asis nga mosumiter kaniya og report sa resulta sa imbistigasyon nga iyang pagahimoon.

Si Konsehal Osmeña nakadawat og report nga ang administrasyon ni Mayor Michael Rama mi-hire og 17 ka nurses alang sa Guba Emergency Hospital sa Barangay Guba ning dakbayan kaniadtong Hulyo ngadto sa Disyembre sa miaging tuig.

Kini maoy rason nga giawhag niya ang Civil Service Commission nga sutaon kon tukma ba ang gihimo sa administrasyon ni Rama nga mi-hire og mga nurses nga wala sunda ang gilatid sa balaud.

Basi sa report nga miabot ni Osmeña kinsa maoy tsirman sa Budget and Finance Committee sa Cebu City Council nga dunay mga nurse nga gidawat nga wala mo-undergo og examination ug wala moatubang sa Personnel Selection Board (PSB).

Si Evangeline Abatayo, hepe sa Human Resource Development Office (HRDO), mibutyag nga sa 17 ka gidawat nga nurses ang duha kanila wala mo-undergo og staff nurses’ written examination.

Samtang tulo lang ‘sab sa 17 ka nurse ang mi-undergo og interview sa mga sakop sa Personnel Selection Board.

Gisaad sa Civil Service Commission nga pahibaw-on nila ang City Hall sa resulta sa ilang gihimo nga pakisusi.