Pagpahigayon sa APEC 2015 sa Nobyembre Plastado Na

(PIA-7) — Ang kagamhanang nasyonal kasamtangan nga nagpahaigayon sa mga council meetings ug embassy briefings agi pagpangandam sa himoong Asia-Pacific Economic Cooperation (APEC) Leaders’ meeting karong Nobyembre matud sa nangulo sa APEC 2015 National Organizing Council (NOC).

Sa gihimo nga pag turn-over sa mga BMW cars ngadto sa gobyerno sa adlawng Miyerkoles, namahayag si APEC 2015 NOC Director General Marciano Paynor, Jr. nga padayon ang gihimong tigom ug konsultasyon sa mga national organizing council members, mga ahensya sa gobyerno ug mga embassies.

Si Paynor mipahibalo nga nakahimo na sila ug embassy briefings sa miaging duha ka bulan ug aduna pay mosunod karong bulan sa Hulyo ug Oktubre alang sa ubang nasud nga wala pa makaapil.

Matud sa maong opisyal, plastada na ang tanang plano nga gikasabotan. May mga pagsusi pa usab nga gihimo sa kahimtang sa ekonomiya sa nasud nga lambigit sa APEC aron ma seguro nga hapsay ug kumpleto ang mga datus nga gikinahanglan sa ipahigayon nga leaders’ meeting.

Gipanglantawan ni Paynor nga moabot sa 21 ka lider nga APEC member countries ang motambong sa sa himoong summit didto sa Manila karong Nobyembre.

Namahayag si Paynor nga base sa mga milabyng panagtigom panalagsa ra mahitabo nga ang lider sa nasud mapakyas ug tambong sa ipahigayon nga summit, ug mahitabo lamang kini kung adunay ipahigayon nga eleksyon sa maong nasud.

Kasagaran mahitabo kini apan nakita gihapon nga 90 porsyento sa mga liders ang motambong sa mga tigom. Dugang ni Paynor nga wala silay rason nganong dili makatambong.

Gi klaro kung motambong ba ang nasud sa China. Gi kumpirmar ni Paynor nga motambong ang gibansagang “Asian giant” lakip na ang naila nga duha ka dagkong nasud, ang South Korea ug Japan.

Gipasabot ni Paynor nga ang APEC Summit usa ka multi-lateral meeting ug dili bilateral. Subay niini nga kasabautan, hisgutan lamang ang mahitungod sa kahimtang sa tagsa-tagsa ka ekonomiya sa matag nasud ug walay labot ang politikanhong agenda. (mbcn/lpp/PIA7-Negros Oriental)