Mayor Rama Nipahigayon sa Ribbon-Cutting sa Logos Hope

(Cebu City PIO) — Opisyal na nga gibuksan alang sa publiko kagahapong adlawa Mayo 6, 2015 Miyerkules ang pinakadakong sailing bookstore nga mao ang MV Logos Hope diin si Mayor Michael L Rama ang nanguna sa ribbon-cutting kauban ang kapitan sa barko nga si Tom Dyer ug Atty. Marc Tolentino isip representante ni Governor Hilario Davide III.

Gipasidunggan ni Mayor Rama ang kapitan sa barko nga si Dyer pinaagi sa paghatag sa libro nga kabahin sa Living Legacy sa 75 ka pamilya dinhi sa Sugbo. Mihatag usab ang City Hall og kapulisan aron masiguro ang seguridad sa palibot.

Ang maong barko adunay 400 ka crew members nga naggikan sa lain-laing parte sa kalibutan.

Matud pa ni Operation Mobilization Philippines nga si Daniel Wong, duha ka Pilipino ang anaa sa maong barko nga na-assign sa communication team nga mao si Jai Diaz isip videographer ug ang usa anaa sa advance team.

Abli kini hangtod Mayo 28 nga mag-abli gikan sa alas-10 sa buntag hangtod sa 9:30 sa gabii matag adlaw’ng Martes hangtod Sabado. Apan kun adlaw’ng Dominggo, abli kini gikan sa ala-1 sa hapon hangtod sa alas-9:30 sa gabii.

Alang sa buot mibisita adunay entrance fee nga P20 matag usa, apan libre kini alang sa mga bata nga nag-edad ug 13 anyos paubos lakip na ang mga Senior Citizens.

Nakadunggo ang MV Logos Hope sa Malacañang sa Sugbo Presidential berth dapit sa Pier 1. Kahinumduman nga mibisita na ang maong barko dinhi sa dakbayan sa Sugbo niadtong Pebrero 2012.

Dugang pa, sunod destinasyon sa maong barko ang Subic dayon La Union. (Cebu City Public Information Office PIO)