GSIS Mohatag og Scholarship sa mga Sakop sa PWDs, IPs, Solo Parents

(PIA-7) — Ang Government Service Insurance System (GSIS) adunay gigahin nga pondo alang sa GSIS Scholarship Program (GSP) sa kwalipikadong 20 ka sakop sa mga persons with disabilities (PWDs), indigenous people (IPs) ug solo/single parents.

Base sa gilatid sa guidelines, adunay gitagana nga 10 porsyento gikan sa gipalapad nga programa sa GSP alang sa gitawag ug “special sectors” sa katilingban gikan sa kagamhanang nasyonal aron mas daghan pa ang molampos ug makatapos sa kolehiyo.

Matud ni GSIS President ug General Manager Robert G. Vergara, angayan lang nga tabangan ang mga takos ug ubos nga kahimtang nga mga sakop sa PWDs, IPs ug single parents base sa Republic Act 8972 (Solo Parents Welfare Act of 2000) aron mahatagan ug kahigayonan nga makab-ot nila ang ilang damgo nga makatapos ug kurso.

Ubos sa maong programa ang GSIS mo abaga sa kantidad nga P20,000 alang sa tuition fees ug miscellaneous fees kada semester. Hatagan usab sila ug monthly stipened nga P2,000.

Kinahanglang aktibo ang miyembro sa GSIS atol sa iyang pag aplay sa scholarship, sigurohon nga nakabayad siya sa premuim contributions nga unom (6) ka bulan; adunay permanent status sa iyang panrabaho sa gobyerno sulod sa tulo na ka tuig ug kinhanglan nga anaa sa salary grade level nga 24 o ubos niini.

Importante usab nga ang sakop niini nakatapos sa high school ug kwalipikadong mokuha sa upat o lima ka tuig nga kurso ug sa mga “priority courses” ubos sa Commission on Higher Education (CHED).

Ang application period gikan lamang sa Mayo 4 hangtud Hunyo 11, 2015. Ang application forms mahimong makuha sa bisan asa nga sangang buhatan sa GSIS o mahimong mo download sa GSIS website, www.gsis.gov.ph.

Ang GSP gilusad sa tuig 1998 ug sukad kaniadto nahimo na kining parte sa pension fund’s corporate social responsibility.

Mahimo usab nga mopadangat ug mga pangutana ug katinawan sa programang GSP ngadto sa GSIS Coporate Social Advocacies and Public Relations Facilities Department pinaagi sa numero: 976-4970; 479-3600 (local 3414). (lpp/PIA7)