DOH, Nakatutok sa Agresibong Kampanya Batok HIV-AIDS

(PIA 7) — Ang Department of Health (DH) agresibo karong nagpahigayon og information campaign aron ipa-usbaw ang kahibalo sa katawhan kalabot sa human immunodeficiency virus-acquired immune deficiency syndrome (HIV-AIDS) nga nakapabalaka karon sa nasud.

Matud pa sa DOH, maka-alarma na ang nagkasakang gidaghanon sa nataptan sa maong sakit matag tuig ug kun magpadayon, lisud na kining ma-kontrolar.

Sigon pa sa buhatan, ang impeksyon taas sa mga lalaking nakig-hilawas sa mga lalaki ra usab.

“Tungkol muna doon sa HIV cases, bilang pagtugon diyan, pinaiigting ng Department of Health ang pagsasagawa ng kampanyang pang-impormasyon upang maging maingat ang mga mamamayan laban sa mga sanhi o pinanggagalingan ng pagkakaroon ng HIV virus,” (Mahitungod una sa HIV cases, isip pagtubag niini, gihingosgan sa Department of Health ang pagpahigayon og kampangyang pang-impormasyon aron mahimong mag-amping ang katawhan batok sa mga hinungdan o sinugdanan sa pagbaton og HIV virus) matud pa ni Presidential Communications Operations Office (PCOO) Kalihim Sonny Coloma Jr. sa usa ka radio interview isip tubag sa gobyerno sa bagbatok sa maong sakit.

Matud pa sa Kalihim nga naghatud usab og serbisyong HIV testing ug counseling ang DOH isip tabang sa mga katawhan.

Samtang nihatag usab og komento si Coloma kalabot sa pagkatap sa bag-ong droga nga “liquid ecstasy” nga giingong nahimo na karong inila sa mga batan-ong drug users.

Matud pa sa Kalihim nga ang National Bureau of Investigation (NBI) nagpahigayon na og mga operasyon aron mapugngan ang paggama ug pagbaligya niining ilegal nga droga.

“Ang PDEA (Philippine Drug Enforcement Agency) at lahat ng mga kinauukulang ahensya ay nagbababala sa paggamit ng iligal na drogang ito,” (Ang PDEA ug tanang mga hingtungdang ahensiya, nipasidaan sa paggamit niining illegal nga droga) matud pa ni Coloma. (ecb/PIA7-Bohol)