Cebu City Local Job Fair Ipahigayon sa Barangay Pahina Central

(Cebu City PIO) –- Aron sa paghatag ug kahigayonan sa mga katawhang Sugbuanon nga nangita ug trabaho, ipahigayon sa kagamhanan ning dakbayan nga gipangulohan ni Mayor Michael L Rama pinaagi sa Department of Manpower Development and Placement kon DMDP ang usa ka Local Job Fair karong Abril 11, 2015 adlawng Sabado ngadto Barangay Pahina Central Sports Complex.

Ang kalihokan salmutan sa nagkadaiyang mga lokal nga kompanya ug ahensya nga magtanyag ug gatosan ka mga bakanting trabaho nga adunay pagtugot sa Department of Labor and Employment kon DOLE. Magsugod kini sa alas-8 sa buntag ug molungtad hangtod sa alas-3 sa hapon.

Giawhag ang tanan nga nangita’g trabaho sa pagsalmot sa maong higayon nga maghatag ug oportunidad nga makatrabaho. Giawhag usab ang mga aplikante sa pag-andam sa ilang resume.

Sa susamang kalambuan, ipahigayon usab sa DMDP ang usa ka Persons with Disability kon PWD Job Fair karong Abril 15 adlawng Miyerkules aron sa paghatag ug kahigayon sa mga katawhang adunay kabilinggan sa ilang panglawas nga makatrabaho. Ipahigayon kini ngadto sa Barangay Cogon Ramos Sports Complex ning syudad.

Dugang pa, alang usab sa dugang kasayuran mamahimong mobisita sa buhatan sa DMDP nga anaa nahimutang sa 2nd Floor sa Ramos Multipurpose Building sa Barangay Cogon Ramos o motawag sa Telephone Numbers 253 – 9212 ug 254-4348. (Cebu City Public Information Office PIO/Greggy Jiggs P. Senados)