Lisensya para Masahista, Ipatuman Na

Ang kadagkoan sa Department of Social Welfare and Development (DSWD) mopatuman na gayud sa balaud nga kadto ra nga mga lisensyado nga masahista ang tugotan nga makapangmasahe isip ilang panginabuhian.

Gibutyag kini ni Kerwin Macopia, usa sa mga staff sa DSWD-7 public information office, nga mipahibalo nga dunay bag-ong hut-ong sa mga blind therapist gikan sa Sugbo ug pipila sa silangang Kabisay-an nga migradwar sa unom ka buwan nga bansay-bansay.

Matud ni Macopia nga ang Presidential Decree 856 naglatid nga ang mga gustong mamahimong masahesta isip ilang panginabuhian kinahanglang mokuha usa og certification gikan sa Department of Health.

Si Macopia miingon nga plano sa DSWD nga sa tuig 2015 hingpit na gayud nila nga ipatuman ang lagda sa Presidential Decree 856 og kinahanglan nga ang tanang masahesta, ma-Persons with Disabilities (PWD) o dili, mokuha og cerification sa dili pa sila mohimo sa ilang trabaho.

Nasayran nga dinhi sa dakbayan sa Sugbo daghan na kaayo nga mga masahesta nga walay lisensya o certification sa DSWD ug DOH nga sila kwalipikado nga mohimo sa ilang trabaho.

Si Nicolas Silot, usa ka buta nga masahesta nga migradwar sa Training Center sa DSWD diha sa Labangon, mitug-an nga tungod sa kadaghan na sa mga masahesta silang mga buta minus na kaayo og makwarta matag adlaw.

Gawas sa natural nga matang sa pagmasahe, daghan na nga massage parlors nga ania sa Sugbo nga gisundog ang estelo sa pagmasahe didto sa Thailand ug ubang kanasuran.