Mga Building nga Gitukod nga Walay Permit, Gipahunong sa OBO

Ang Office of the Building Officials (OBO) mipahunong sa pagtukod sa duha ka building nga nahimutang unahan nga bahin sa Marco Polo Plaza Hotel tungod kay wala kini permiso gikan sa OBO.

Si City Engineer Kenneth Carmelita Enriquez nga maoy naglingkod isip hepe sa OBO miingon nga ang maong kaso gitugyan na niya sa City Legal Office (CLO) aron kapasakaan og kaso ang mga tag-iya sa building.

Ang MetroCebuNews dili usa mobutyag sa ngalan sa duha ka tag-iya hangtud nga mapasaka na ang kaso batok kanila nga paglapas sa lagda sa National Building Code.

Ang maong balaud naglatid nga sa dili pa tukoron ang usa ka building kinahanglan nga ang iyang tag-iya o kaha kontraktor mokuha gayud usa og construction permit gikan sa OBO.

Matud ni Enriquez nga ang mga tag-iya sa maong mga gitukod nga building nakalapas sa balaud kay misugod sa pagtukod nga walay construction permit sa OBO.

Apan samtang gipahunong sa OBO ang duha ka building, nabantayan nga daghan pa nga mga gipangtukod nga building dili halayo nga wala gihapo’y building permit.

Mga kawani sa OBO nagkanayon nga kuwang sila og mga sakop nga makahimo sa pag-inspection sa mga nagpadayong construction aron sutaon kon aduna ba’y permit.

Ang lagda nagkanayon nga ang kontraktor o tag-iya sa balay kinahanglang mobutang sa karatola atubangan sa gitukod nga building nga maglatid kanus-a giisyu ang permit ingon man ang iyang permit numbers.

Matud ni Enriquez nga malipay kaayo sila sa OBO kon ang katawhan mopahibalo kanila sa higayon nga makakita sila nga adunay gitukod nga building nga walay permit.

Gawas nga peligro ang pagtukod og building nga dili masiguro ang iyang kalig-on, ang kagamhanan dili usab makakwarta gikan sa ibayad sa mga tag-iya sa paglukat niini og permit.