PAL, Makasulod nag Balik sa Europa

(PIA)–Gilibkas na sa European Union ang ilang pagpugong sa Philippine Airlines (PAL) sa pagtugpa sa bisan asang lugar sa Europa.

Kahinumduman nga niadtong 2009, gipailawom ang PAL sa usa ka International Civil Aviation Organization (ICAO) Audit nga nagpakita sa mga safety concerns nga mamahimong delikado ang PAL sa mga pasahero sa Europa.

Gipakanaug gilayon sa ICAO ang pagpugong sa PAL sa pagsulod sa Europa sugod sa Marso sa 2010.

Gani, dili lang ang PAL kon dili ang tanang air carriers gikan sa Pilipinas ang gipugngan sa pagtugpa sa Europa.

Kini ang usa sa mga labing dako nga rason nga mihinay ang direktang nga turistang taga Europa paingon usab sa Pilipinas.

Apan usa ka follow-up audit nga gihimo sa ICAO niadtong October 2012 mipakita nag kaugmaran sa mga pamaagi ug seguridad sa PAL, apan wala pa gihapon papasa ang ban.

Laing audit sa Pebrero niadtong 2013 mipakita nga may dako na nga kausaban ang nahimo aron mahimo nang tangtangon ang pagpugong sa PAL.

Sa us aka pahayag, si Siim Kallas, Commission Vice-President ug kinsa maoy responsible sa transport, namahayag nga ang “EU air safety list namugna aron kapanalipdan ang kapanganuran sa Europa ug ang mga taga didto, ug kini usan magsilbi nga pamukaw sa mga nasud ug ilang mga eroplanong angayan tul-iron na ang ilang mga safety measures.

Dugang niya, “karon, among gikompirmar ang among kabubot-on sa pagtangtang sa Philippine Airlines sa listahan dala sa ilang tinud-anay nga pagpahimutang sa mga kabag-ohan ug sa pagpatuman sa international safety standards sa pamaagi nga malungtaron.”

Kini samtang padayon pa gihapon ang ban alang sa ubang mga Pinoy nga air carriers hangtud nga ila na usab nga mapahimutang ang gikinahanglang pagsunod sa mga mahinungdanong aviation safety regulations. (mbcn/RAC/PIA7-Bohol)