News
DTI: Renewal sa Business Name Mahimo sa Online
Giawhag sa Department of Trade and Industry (DTI) ang mga negosyante nga angay mopahimulos sa online early renewal sa business name registration alang sa dinalian nga pagproseso sa ilang negosyo dinhi sa nasud.
Si Elvira Bongosa, Information Officer sa Philippine Information Agency (PIA) mikutlo sa gipahayag ni DTI Undersecretary Nora Terrado kinsa miingon nga pinaagi sa maong lakang, gawas nga kalikayan ang paglinya, makadaginot usab ang kagamhanan sa gasto sa mga papel.
Midugang si Bongosa nga ang DTI mihatag sa iyang website alang sa mga may kaikag niini.
Matud pa niya nga angay lang mo-log-on sa Business Name Registration System’s (BNRS) website, nga mao ang bnrs.dti.gov.ph ang mga negosyante nga buot mo-apply sa renewal sa ilang business name.
Nagkanayon usab si Bongosa nga kinahanglang i-proseso ang renewal sa ilang business name registration ,tulo ka buwan sa dili pa ang expiration niini.
Sumala ni Bongosa nga sa daan nga manual scheme, ang renewal sa business name information himuon pinaagi sa DTI tellers nga adunay bayranang mokabat sa P65.
Kini alang sa renewal fee nga P50, samtang ang P15 alang sa documentary stamp tax matag transaksiyon.
Hinuon, niining online early renewal scheme, pinaagi sa electronic payment (ePayment) facility gamiton ang BancNet debit card o GCash, ang renewal transactions mahimo na nga i-proseso sa computers o mobile phones pinaagi sa internet sulod lamang sa 15 minutos bisan unsang orasa ug bisan asang dapita, matgud pa ni Bongosa.
