Sabang Gitangtang na sa SWAT

Gitangtang sa iyang pagkasakop sa Special Weapon & Tactics (SWAT) si SPO1 Arthur Sabang samtang gipailawom og imbestigasyon sa pasangil nga nanion og armas ngadto sa gobernador ug sa ubang mga opisyal sa Masbate atol sa Sinulog Grand Parade.

Si Cebu City Acting police director Conrad Capa mipahibalo niini’ng maong kalamboan ngadto ni Vice Mayor Edgardo Labella, ang tsirman sa Police Coordinating and Advisory Council (PCAC).

Matud ni Labella nga gitug-anan siya ni Capa nga si SPO1 Sabang gibutang karon sa “floating” status samtang magpadayon pa ang imbestigasyon sa iyang kaso base sa reklamo ni Masbate Governor Rizalina Seachon Lañete.

Adunay uban nga mihulagway nga posible’ng makapa-low morale sa ubang kapolisan ang nahitabo ni SPO1 Sabang nga igo lang mituman sa gimando kanila aron pagpugong sa mga tawo nga walay labot sa pagsulod sa Cebu City Sports Center.

Ang grupo ni Sabang mipugong sa daghang mga tawo nga makasulod sa rota sa Sinulog Parade sa dayon na’ng sulod sa Sports Center kaniadto’ng Enero 18.

Sila si Gobernador Lañete apil sa mga tawo nga gipugngan sa grupo nila ni SPO1 Sabang kay wala sila mailhi nga mga opisyal sa Masbate nga gusto’ng moipon sa ilang contingents nga talisulod na sa Sports Center.

Nangangkon ang grupo ni Lañete nga gituonan sila’g armas ni SPO1 Sabang, apan ang polis nangatarungan nga igo lang niya nga gibanwagan sa iyang flashlight ang grupo sa gobernador nga wala pa niya hiilhi kay sila wala magpaila.

Ang flashlight ni SPO1 Sabang anaa gitaud uban sa sumbohan sa M16 Armalite rifle sa polis. Si Vice Mayor Labella miingon nga gusto usab nila nga molutaw g’yud ang tinuod nga isyu.