DepEd: Enero 31 Ang Pagpanglista sa Kinder ug Grade 1

Gitakda sa Department of Education (DepEd) nga sugdan na sa Enero 31, 2015 ang pagpatuman sa early registration sa mga batang motungha sa kinder ug grade 1 sa mga pampublikong tunghaan sa tibuok nasud.

Gibutyag kagahapon ni Elvira Bongosa, information Officer sa Philippine Information Agency (PIA) nga kini maoy gimando ni DepEd Secretary Armin Luistro, kinsa gustong makakuha og sayong impormasyon kalabot sa tukmang gidaghanon sa mga estudyante nga magsugod na sa pagtungha sa umaabot nga Hunyo ning tuiga.

Midugang si Bongosa nga tuyo sa kalihim sa edukasyon nga kaandaman dayon og solusyon ang kasagarang suliran nga ilang masugatan inig-abli sa klase matag tuig ilabi na sa school year 2015-2016.

Miingon usab si Bongosa nga maoy gusto ni Luistro nga karon pang daan masayran na ang kakulangon sa mga lingkoranan ug mga lawak klasehanan sa mga estudyante, aron ikaandam na ang solusyon niini.

Gawas niini, ang mga libro usab gikinahanglan nga maimbentaryo na nga daan aron nga sa panahon nga magsugod na ang klase sa Hunyo, andam na kining tanan.

Nagkanayton si Bongosa nga pinaagi sa sayong pagpa-rehistro, masayran usab sa DepEd ang gidaghanon sa mga estudyanteng madugang sa ilang listahan gikan sa mga barangay, lungsod, siyudad ug lalawigan sa tibuok nasud.

Miingon usab si Bongosa nga lakip sa target sa DepEd ang mga batang 5-anyos nga mosulod sa kinder ug 6-anyos nga motungha usab sa grade 1.

Busa higpit nga giawhag sa DepEd ang mga ginikanan nga makighiusa sa maopng kampanya alang sa early registration. sa mga batang motungha karong tuiga.