Gun Ban Ipatuman Sugod Karong Adlawa

Sugod karong adlawa, gipasidan-an sa Commission on Elections (Comelec) nga hingpit nang ipatuman ang election gun ban ug ubang gidili nga kalihokan o “prohibited acts”.

Ang Information Officer sa Philippine Information Agency (PIA) Elvira Bongosa, nagkanayon nga molungtad kini hangtud sa Marso 2, 2015 o 30 ka adlaw sa dili pa ang piniliay sa Sangguniang Kabataan o SK ug sa samang higayon sulod usab sa 15 ka adlaw human sa election.

Nagkanayon si Bongosa nga base sa Comelec Minute Resolution No. 15-0026, ang gun ban exemptions nga giluwat atol sa local ug national elections kaniadtong Mayo 2013, ug sa barangay elections sa miaging kaniadtong October 2013 wala nay gibug-aton karon, busa dili na dawaton.

Apan iyang gipasabot, nga si Atty. James Jimenez, ang tigpamaba sa Comelec mihisgot nga ang mga tigpatuman sa balaod ug mga security personnel sa nasud mahimong mo-apply og renewal sa ilang Certificates of Authority/Gun Ban Exemptions.

Midugang si Bongosa nga gitataw usab ni Jimenez nga walay labot niini ang mga regular security component sa Presidente, Bise Presidente, mga senador, kongresista ug gobernador, tanang local elective officials (gawas sa mga opisyal sa barangay).

Ingon usab sa mga Justices, Judges, Cabinet secretaries, Chairman ug Commissioners sa Commission on Elections, Chief of Staff sa Armed Forces of the Philippines (AFP) ug Philippine National Police (PNP), major service commanders, Director General ug mga Senior officers sa PNP.

Gipahayag ni Bongosa nga ang tanang security personnel nga gikan sa PNP, AFP ug uban pang law enforcement agencies pabalikon sa ilang tagsa-tagsa ka unit sugod karong adlawa, Enero 22.