Seniors Pasudlon og Trabaho

Pugson sa kagamhanan sa dakbayan sa Sugbo ang mga tagdumala og balay-patigayon nga mo-hire sila og senior citizens isip ilang mga kawani kay kun dili nila tumanon, pasirad-an ang ilang negosyo.

Mao kini ang mahitabo kun hingpit na nga maaprobahan ang gisugyot nga ordinansahon ni Konsehal Gerardo Carillo nga gihimoan na og public hearing didto sa Cebu City Council kagahapon.

Walay bisan usa nga mitunga atol sa public hearing nga nagpadayag nga sila supak sa gisugyot nga ordinansahon. Ang duha ka tawo nga mihatag sa ilang baruganan pulos pabor nga aprobahan ang ordinansahon.

Si Domingo Chavez, pangulo sa Office of the Senior Citizens Affairs (OSCA) sa dakbayan sa Sugbo, miingon nga sigurado’ng malipay ang iyang mga sakop niini’ng mao nga sugyot.

Gitataw ni Chavez nga daghan pa nga mga senior citizens nga bisan og may edad na, apan makahimo pa gihapon sa pagtrabaho.

Si Gina Roa, nga maoy nagrepresentar sa Hotel, Resort and Restaurant Association of Cebu (HRRAC), miingon nga dili sila supak apan tingali dunay mga balay-patigayon sama sa massage parlors nga dili angay’ng pugson sa pag-hire og mga tiguwang.

Matud ni Roa nga adunay mga trabaho nga magkinahanglan og kawani nga kusgan ug inabtik mao nga ang mga senior citizens dili na magsilbi sa mao nga tahas.

Kun maaprobahan ang ordinansahon ni Konsehal Carillo dili pabalibaran sa mga tagdumala og balay-patigayon ang mga senior citizens nga moaplay og trabaho kun wala pa makaabot og 10 % sa ilang total workforce ang mga tiguwang nga ilang na-hire.

Kadtong motuman sa ordinansa, hatagan og dos porsiyento nga diskuwento sa ilang bayranan nga buhis sa dakbayan sa Sugbo.