Allowance sa mga College Scholars sa Dakbayan, Usbawan

Gikalipay sa mga Cebu City Scholars ang pagduso ni Konsehal Alvin Dizon og ordinansahon nga magdugang sa ilang school supply allowance gikan sa P500 ngadto na sa P1,000 matag semester.

Si Regel Garcia, usa ka scholar, miingon nga dako og makatabang kaniya ang 500 nga dugang allowance.

Samtang si Roberto Base Jr., sa Association of Cebu City Scholarship, miingon nga ang P10 mil nga gitagana para sa tuition fees kuwang ra g’yud ug unta giapil kini pagsugyot ni Konsehal Dizon nga mapun-an.

Giangkon ni Dizon nga ang P10 mil nga tuition fee kuwang ra g’yud sa private schools, apan husto ra kini sa public schools.

Nahibaw-an nga kanunay lang malangan ang paghatag sa allowance sa mga scholars ug usahay malimtan na lang.

Matud ni Dizon nga aron dili madugay ang pagpanghatag sa allowance, kinahanglan nga mo-submit dayon ang mga participating schools sa mga requirements.