CTO Nakakolekta nag P433.5 Milyon sa Buwis-Patigayon

Miabot na og P433.5 milyones ang business taxes nga nakolekta sa mga kawani sa Cebu City Treasurer’s Office gikan sa Enero 3 hangtud sa Enero 20.

Naglaum si City Administrator Lucelle Mercado nga sa buwan sa Enero mokolekta sila og kapin sa P500 milyones gikan lang sa business tax ug wala pay labot sa makolekta nila sa real property taxes ug ubang koleksyon.

Si City Treasurer Diwa Cuevas miingon nga ang mga tagdumala og mga balay-patigayon may higayon pa hangtud karong Biyernes sa pagbayad sa ilang buhis nga walay patong nga multa.

Matud ni Cuevas nga kadto’ng mobayad lapas sa Enero 23 patongan na og 25 porsiyento nga multa ug laing dos porsiyento nga interest kada buwan.

Si Cuevas mitug-an nga mas daku karon ang kantidad nga ilang nakolekta kun itandi sa miagi’ng tuig. Hinuon, dako kaayo ang kantidad nga angay’ng kolektahon sa mga tax collectors karong tuiga aron masustenehan nila ang P13.3 Bilyones nga budget.

Gisugyot unta ni Mayor Michael Rama ang P19.1 Bilyones nga budget sa dakbayan para karong tuiga, apan gihimo lang nga P13.3 Bilyones sa mga konsehal kay nagtuo sila nga dili gani makolekta ang kinatibuk-an nga kantidad.

Si Cuevas miingon nga ang mga tax collectors moestar pa sa SM City Trade Hall hangtud sa Enero 30 aron pagdawat niadto’ng mobayad og buhis, apan mipasidaan nga mopatong na sila og multa.

Gituyo sa City Treasurer’s Office nga miabang og luna sa SM City aron adto manawat og buhis sa tumong nga mapasayon sa mga magbubuhis ang pagbayad sa ilang business taxes kay bugnaw man ang mao nga dapit.

Karong tuiga, target sa mga tax collectors nga mokolekta sila og P1.1 Bilyones gikan lang sa business tax ug walay labot sa buhis gikan sa mga tag-iya og kayutaan, building ug mga makinarya.

Matud ni Mayor Rama nga mag-estrikto ang dakbayan karon pinaagi sa paggukod niadtong mga magpapatigayon nga dili mobayad og buhis ngadto sa kagamhanan.