DepEd 7: Klase Dili Maapektuhan sa Sinulog 2015

Gipasalig sa kadagkoan sa Department of Education (DepEd) nga ang klase sa mga tinun-an nga mosalmot sa Sinulog sa Kabataan sa Dakbayan dili maapektahan tungod kay ang pagpraktis himuon nila kini human na sa ilang klase.

Mao kini ang gitataw ni DepEd Cebu City Schools Superintendent Rhea Mar Angtud, kinsa mibutyag nga ang ubang praktis sa mga tinun-an nga mosalmot sa Sinulog sa Kabataan himuon usab sa adlaw nga Sabado ug Domingo.

Adunay mga tinun-an sa tunghaang publiko dinhi sa dakbayan nga mosalmot sa Sinulog sa Kabataan ug makig-indigay sila sa kanindot sa ilang sayaw sa mga tinun-an gikan sa lainlaing tunghaan sa kalungsuran ug dakbayan nga sakop sa probinsya sa Sugbo.

Gipaneguro ni Angtud nga dili gayud apektado ang pagtuon sa mga bata bisan og mosalmot pa sila sa Sinulog sa Kabataan.

Ang unang lima nga labing nindot mosayaw og Sinulog sa mga tinun-an sa dakbayan ug lalawigan, makasalmot sa Sinulog Grand Parade ug may kahigayonan nga molangkat sa P1 milyon nga first prize sa lainlaing category.

Karong tuiga, ang first prize winner sa Sinulog-based, Free Interpretation ug Street Dancing categories makadawat og usa ka milyon ka pesos nga ganti, P700 mil sa second prize, P500 mil sa ikatulo’ng ganti, P300 mil sa ika-upat ug P200 mil sa ikalima nga puwesto.

Samtang ang kadagkoan sa Sinulog Foundation Incorporated manawat pa hangtud sa Enero 10 og mga contingents nga gusto’ng moapil sa Sinulog grand parade aron mas mosamot kanindot ang kalihukan sa ikatulo’ng Domingo ni’ng buwana.

Si Ricky Ballesteros, executive director sa Sinulog Foundation Inc., miingon nga pagka karon 37 na ka dancing contingents ang mipalista nga mosalmot sila sa Sinulog grand parade unya sa Enero 18. Kini walay labot sa mga float, puppets ug higante.

Gani pagka karon, aduna nay mga contingents nga nagsugod na sa pagbansay-bansay sa ilang pagsayaw anha sa gihimo nga stage sa Cebu City Sports Center. Matud ni Ballesteros nga gitugotan nila ang mga dancing contingents nga makapraktis diha sa stage aron dili magkaguliyang ang ilang sayaw.

Walay kausaban sa carousel-type nga pagsayaw sa mga contingents nga molibot gihapon gikan sa P. del Rosario subay sa New Imus Road ug moliko sa General Maxilom Avenue paingon sa Fuente Osmeña.

Gikan sa Fuente Osmeña ang mga dancing contingents mosubay sa Osmeña Boulevard ug moliko sa R. R. Landon dayon mosulod sa Cebu City Sports Center ug mogawas ngadto sa P. del Rosario.

Kun asa magsugod pagsayaw ang mga contingents diha sa carousel-type route, adto usab sila motapos kun mahibalik na sila sa mao nga dapit inigkasayo’ng gabii.