Duha Apektado sa City Hall Revamp

Duha lang ka department head sa Cebu City Hall ang apektado sa paglahugay nga ipatuman ni Mayor Michael Rama sugod Enero 5 aron pagpalambo sa serbisyo sa dakbayan.

Ang apektado mao sila si Atty. Dominic Diño nga balhinon gikan sa pagka hepe sa Human Resource Development Office (HRDO) ngadto sa pagka chief of staff sa Office of the Mayor.

Si Atty. Ferdinand Cañete tangtangon usab sa pagka hepe sa Assessor’s Office ug ibalik kini sa City legal Office. Ihulip kang Atty. Diño sa pagka hepe sa HRDO mao si Atty. Mary Ann Suson samtang ang ipuli ni Cañete mao si assistant city assessor Leizl Gonzaga.

Ang kausaban sa mga department heads pormal nga ipahibalo ni Mayor Rama kagahapong adlawa apan nahibaw-an nga si assistant city administrator Jovy Morelos balhinon usab isip assistant sa HRDO chief.

Si CCMC director Dra. Gloria Duterte himuon na lang pangulo sa medical services samtang si Atty. Chris Panugaling maoy pangulo sa CCMC administrative services ug sila ubos sa pagsuperbisar ni Dra. Lucelle Mercado, nga maoy city administrator.

Gitataw ni Rama nga ang ipatuman niya nga revamp gitumong aron mas molambo pa ang serbisyo sa City Hall ngadto sa katawhan.

Gawas ni Mayor Rama, ang iyang mga sinaligan nga naglakip nila ni MCWD Chairman Rene Mercado, kanhi konsehal Joy Pesquera ug uban pa maoy nagbayloay og huna-huna kun kinsa ang ibutang sa mga pwesto isip department ug assistant department head.