Tomas Mi-React sa Kasong Gipasaka ni Rama Batok sa Konseho

Nagtuo si Kanhi Kongresista Tomas R. Osmeña nga ibasura lang sa korte ang ipasaka nga kaso ni Mayor Michael Rama kabahin sa pagbutang sa mga sakop sa Cebu City Council og kondisyon diha sa giaprobahan nila nga 2015 Annual Budget.

Matud ni Osmeña nga adunay katungod ang konseho nga mobutang og lagda kun unsaon sa paggasto ang kuwarta nga ilang giaprobahan nga gastohon sa dakbayan sa Sugbo karong sunod tuig.

Si Mayor Rama nasuko kaayo nga gibutangan sa mga konsehal og kondisyon nga dili niya mahimo nga ipatuman ang mga infrastructure projects nga mokantidad og P4.5 Bilyones gawas lang kun makabaligya kini og yuta sa South Road Properties (SRP).

Gitataw ni Osmeña nga ang gisugyot nga budget ni Mayor Rama naglatid nga ang maong mga proyekto, sama sa pagtukod og mga building, gastohan kini gikan sa pundo nga makuha sa halin sa yuta sa SRP.

Si Osmeña miingon nga natural lang maniguro ang mga konsehal nga kun adunay makolekta nga kuwarta ang dakbayan ang unahon niini nga proyekto mao gayud kadto’ng kapahimuslan pag-ayo sa katawhan.

Samtang si Konsehal Margarita “Margot” Osmeña nga maoy pangulo sa committee on budget and finance mitataw nga ang tukma nga himuon ni Mayor Rama mao ang pagpaninguha nga makabaligya siya og yuta sa SRP aron mapatuman niya ang gipangandoy niya nga mga proyekto.

Si Rama mimando ni City Legal Officer Jerone Castillo nga higayon ang kaso nga Usurpation of Official Function nga ipasaka batok sa mga konsehal kay ang ilang gihimo maisip na nga pagpanghilabot sa iyang trabaho isip mayor.