Kasadya sa Downtown, Gisubhan Na!

(Public Information Office) — Pormal nga gilusad sa kagamhanan ning dakbayan ang pagsaulog sa Kadaya sa Downtown karong tuiga niadtong Disyembre 11 adlawng Huwebes didto sa dalan Colon nga mao ang pinakakaraang dalan sa tibuok Pilipinas.

Subay sa temang, “Colon: Dalan sa Kalinaw, Kalambuan ug Kasadya,” ang kalihokan nga anaa na sa ika-napulo nga tuig karon inisyatiba ni Cebu City Mayor Michael L Rama nga iyang gisugdan niadtong tuig 2005 sa Bise Mayor pa kini ning syudad.

Gisugdan ang grand launching activity ug usa ka engranding parada paingon sa Colon Obelisk diin gipahigayon ang programa.

Gipasundayag sa mga tinun-an gikan sa nagkalain-laing tunghaan ning syudad ang ilang talento sa pagsayaw, pagkanta ug uban pa.

Atol sa kalihokan gipahigayon ang libreng pagbisita sa mga nagkadaiyang heritage sites sama sa Val San Diego House, Heritage Monument ug nagkadaiyang Museums.

Karong tuiga gilusad ang Christmas Story Station nga gisalmutan sa mga establesemento nga nahimutang sa dalan Colon. Magsilbi usab nga atraksyon sa Dalan Colon ang matag gabii nga ‘Night Market’ nga molungtad hangtod sa Enero 16, 2015.

Dugang pa, ang kalihokan nga gitambungan sa mga nagkalain-laing sektor ug organisasyon mabulokong nahuman pinaagi sa usa ka engranding fireworks display. (Greggy Jiggs P. Senados, PIO Staff)