PAPI Cebu Mosalmot sa NGP

Nagtinguha ang mga myembro sa Publishers Association of the Philippines, Inc. (PAPI) Cebu Chapter nga mosalmot sa national greening program (NGP) nga gilusad sa kagamhanan pagpalabong sa mga upaw nga kabungtoran sa Kabisaya-an.

Kini human sa malampuson nga pagsalmot sa mga membro sa PAPI sa Metro Manila ug Luzon sa NGP nga gipasiugdahan sa Department of Environment and Natural Resources (DENR) didto sa lalawigan sa Isabela.

Nasuta nga mikabat sa 100 ka membro sa PAPI sa Luzon ug Metro Manila ang misalmot sa pagpananom og mga kahoy nga mahogany ug narra sa duha ka ektaryang yuta sa sitio Estampa, Quirino, Cordon, Isabela sa miaging semana.

Si PAPI national president Louie Ariola nagkanayon nga ang pagsalmot nila sa NGP sa gobyerno maoy paghatag nila og “core value” o dakong bili sa pagtahud sa kalikopan.

“Usa usab kini ka bahin sa corporate social responsibility sa PAPI isip pagdani sa publiko nga angay panggaon ang kalikopan pinaagi sa pagpananom og kahoy, ” matud pa ni Ariola.

Apan tungod kay lakip ang nasud sa ASEAN economic integration, si Ariola nagkanayon nga labing maayo dili lamang mga kahoy ang ipalabong sa kabungtoran sa nasud, kunduli bisan ang kawayanan.

“Ang kawayan usa ka “signature Philippine product” diin ang mga bahin sa lawas sa kawayan daghan kaayo og mahimong produkto sa labing ikaila sa nasud nga Pilipinhon,” sumala ni Ariola.

Gumikan niini, giawhag usab niya ang kadagkoan sa PAPI sa Cebu nga gipangunahan sa PAPI national vice president for the Visayas Andy Manatad ug PAPI Cebu Chapter President Engr. Greg Senining nga mosunod usab sa mga gimbuhaton nga gilusad sa PAPI Metro Manila ug Luzon alang sa ikaayo sa palibot sa nasud.