Maestro Naghikog

Maestro sa Gun-ob National High School sa dakbayan sa Lapu-Lapu naghikog pinaagi sa pag-unay’g dunggab sa iyang ulo gamit ang screwdriver nga maoy nakaingon sa iyang kamatayon.

Ang mao nga maestro gituohan nga nag-hallucinate nga adunay tawo nga buot mopatay kaniya sa wala pa kini maghikog.

Si Grantfil Parantar, 34, didto nagpakamatay sa balay sa iyang mga ginikanan sa Sitio Pakpakan, Barangay Basak, dakbayan sa Lapu-Lapu sa hapit na motunga’ng gabii kaniadto’ng Miyerkules.

Matud sa report nga si Parantar nagpuyo na sa Sitio Ylaya sakop sa Barangay Marigondon.

Sa imbestigasyon ni SPO2 Manolito Abellanosa sa Lapu-Lapu City Police Office (LCPO) Homicide Section nasayran nga usa ka oras sa wala pa nahitabo ang krimen, si Parantar mitug-an sa iyang asawa nga adunay gusto’ng mupatay kaniya.

Kaniadtong orasa, ingon sa nagsalimuang ang biktima. Mibiya sa ilang balay ug misakay og tricycle paingon sa balay sa iyang mga ginikanan sa Barangay Basak.

Ang maestro misulod sa kuwarto sa iyang igsuong babaye ug gitrangkahan ang lawak.

Matud ni SPO2 Abellanosa nga ang amahan ni Parantar nakabantay nga may kasikas sa kuwarto sa anak niya’ng babaye nga si Febilyn mao nga ilang gisusi ug nadiskobrehan ang paghikog sa maestro.

Si Parantar naligo na sa iyang dugo og may samad-dinunggaban sa iyang ulo. Matud ni SPO2 Abellanosa nga sa miaging mga adlaw ang asawa ug amahan ni Parantar nakamatikod og kausaban sa lihok sa maestro.