DSWD7 Miporma’g Grupo sa mga Batan-on

Giporma sa Department of Social Welfare and Development (DSWD)7 ang mga kabataan ngadto sa usa ka grupo sa pagpananom og kahoy sa Central Visayas ug ang una nga nakahimo og mga proyekto sa pagpananom mao ang Negros Oriental.

Si DSWD7 Regional Director Merecedita Jabagat mihingalan niini nga Environmental Movement for Earth (EME) diin malampusong gipadagan pinaagi sa mga batan-on sa barangay Simboro, Pamplona, Negros Oriental.

Usa sa mga membro sa maong pundok nga si George Villega, 16, nga taga Simboro maoy malampuson kaayo sa pagpananom og kahoy isip pagpalig-on sa pagpreserba sa footbridge sa Inolocan River sa Pamplona nga gihatag sa KALAHI CIDSS.

Matud pa ni Jabagat nga ang mga kauban sa grupo ni Villega mga batan-on usab nga nag-edad og gikan sa 9- 24 anyos, diin ang uban aktibo sa pag-eskuyla samtang ang uban kanila wala na magtungha.

Miingon si Jabagat nga unang gipananom sa grupo mao ang mga Mahogany apan tungod kay gibahaan , nangalarot kini ug giusban nila og pananom niadtong miaging Marso niining tuiga.

Midugang si Jabagat nga samtang nanubo na ang maong mga kahoy, nananom usab og mga kawayan ang maong mga batan-on sa daplin sa sapa aron nga makapugong kini sa yuta gikan sa pagkatimpag ngadto sa tubig.

Nagkanayon si Jabagat nga tumong sa maong grupo nga dili na kan-an sa tubig ang tampi sa sapa aron magpabilin kini sa iyang kahimtang sa pagkakaron.

Ang footbridge nga gidepensahan sa maong grupo mao ang 100-meter linear cable footbridge, nga natapos niining tuiga sa balor nga P4,003,733 gikan sa KALAHI CIDSS-NCDDP o Kapit-Bisig Laban sa Kahirapan – Comprehensive and Integrated Delivery of Social Services—National Community-Driven Development Program.

Usa kini sa tulo ka programa sa paghaw-as gikan sa kakabus nga gilusad sa DSWD7 , matud pa ni Jabagat.

Midugang ang regional director sa DSWD7 nga unta molampos usab ang ubang grupo sa mga batan-on sa mga lalawigan sa Cebu, Bohol ug Siquijor sama sa taga Negros Oriental.