Batakang Serbisyo Dalhon sa Ganghaan sa mga Sugbuanon – Mayor Rama

Kabahin sa misyon sa pangobiyerno ni Cebu City Mayor Michael L Rama mao ang pagdala sa batakang serbisyo sa City Hall ngadto sa ganghaan o kaugalingong tugkaran sa mga Sugbuanon. Dili man kini literal nga tugkaran sa panimalay apan ngadto gayod sa ilang mga barangay.

Agig pag tuman niini, gimandoan ni Mayor Rama ang ‘Frontline Cluster Services’ sa Cebu City Hall sa pagpahigayon ug senemana nga ‘Community outreach program’ nga mas nailhang “City Hall at Your Doorsteps” kon Piyesta sa Pagpangalagad, diin matag adlawng Biyernes dalhon ang mga serbisyo sa 22 ka mga departamento sa city hall ngadto sa mga kabarangayan niining dakbayan.

Biyernes karong semanaha Nobiyembre 21, 2014, ang Barangay Toong maoy duawon sa mga kawani sa dakbayan aron sa paghatod ug libreng mga serbisyo ngadto mismo sa ilang Barangay Hall.

Kahinumduman nga kanunay nga gibalik-balik sa Mayor nga, “Ato kining buhaton lukop ning dakbayan, kamong katawhan angay gayod hatagan sa tim-os nga pangalagad sa ngalan sa tiunay nga serbisyo.”

Samtang ang maong programa nagahatag ug batakang panerbisyo sa katawhan sama sa libreng konsultasyon sa rehistro sa pagkatawo, pagpakasal, ug pagkamatay; libreng medical ug dental nga serbisyo; pagpanglimpyo sa mga kanal ug drainage; pagpanaod ug pagpang-ayo sa mga street lights; libreng rehistro, kapon ug bakuna sa mga iro ug iring; libreng laboratory services sama sa bloodtyping ug blood sugar testing; libreng feeding sa mgakabataan; libreng pagpanghatag ug mga seedlings; ug libreng seminar sa epekto sa pagamit ug ginadiling druga, traffic rules, mga kalambuan sa dakbayan, ug uban pa.

Dugang pa, Biyernes sa milabayng semana Nobiyembre 14, ang mga residente sa Barangay Banilad maoy nahatagan sa libreng mga serbisyo gikan sa Cebu City Hall nga gidala ngadto sa ilang tugkaran.

(Cebu City – Public Information Office)

Image Credit: PIO