Mga Bata Gibalbal sa Ungo

Tulo ka bata sa Barangay Buhisan, dakbayan sa Sugbo, ang giingong gipatay sa usa ka “ungo”. Nunot niini, naalarma na karon ang lumolupyo sa mao’ng dapit ug dili na mo-kompiyansa pagbiya sa ilang mga anak panahon sa gabii.

Ang katapusang gipaak sa ungo nga matud pa nagpakairing-iring diha nga misulod sa balay mao ang duha pa lang ka
semana nga masuso nga anak sa magtiayon nga Aquilles ug Lorna Sabidor, nagpuyo sa Sitio Puso, Barangay Buhisan.

Ang apohan sa bata nga si Sylvia Sabidor, 65-anyos, mitug-an sa mga tigbalita nga ang itom nga iring misulod sa gubaon nga balay sa iyang anak nga nangatulog na unta mga alas utso sa gabii kaniadtong Miyerkoles.

Gisaysay ni Sabidor nga ang balay sa iyang anak adunay daghang mga buslot sa bungbong nga makalusot ang iring mao nga gituohan nila nga ang “ungo” nga nagpairing-iring sayon ra kaayo nga nakasulod.

Nakatulog na unta ang magtiayon uban sa ilang mga anak, apan kalit sila nga nahipugwat diha nga mitiyabaw pag-ayo ang masuso nila’ng anak. Abtik sila nga mibangon ug gisuta ngano nga mitiyabaw ang bata ug nakita nila ang iring nga milukso ug milusot sa lungag.

Nakita sa magtiayon nga ang bata adunay agi sa pinaakan sa iyang liog nga milagom ug may dugo nga migawas sa iyang
ilong. Gidala nila ang bata sa ospital apan namatay g’yud ang bata.

Matud ni Sabidor nga ang lain niya’ng apo nga nagpangedaron og lima pa ka buwan gipaak gihapon sa mao nga iring-itom nga gituohan nila nga usa ka ungo nga nagpairing-iring.

Si Sabidor miingon nga ang lima ka buwan niya’ng apo nga namatay usab pipila ka buwan na ang nakalabay anak nila ni
Janice ug Dalmacio nga tua karon sa Manila ug ang bata gibilin lang kaniya.

Gawas sa duha ka apo ni Sabidor, may lain pa nga bata nga anaa pa gani gihaya karon sa kapilya sa Sitio Puso ug ang mga ginikanan miingon nga may nakita usab sila nga pinaakan sa liog sa bata.

Si Buhisan Barangay Kapitan Gremar Barete wala g’yud kaayo motuo nga usa ka ungo ang mipatay sa mao nga mga bata apan mipasalig nga pahimoan niya kini og pakisusi.

Bisan gani si Police Inspector Jeciree Saquilabon nga nadistino sa Police Regional Office (PRO)-7 ug taga Sitio Puso, Buhisan miangkon nga gikulbaan na kaayo sila sa report nga may ungo nga nakapatay na og tulo ka bata sa dapit nga ilang gipuy-an.

Mga lumulopyo sa Buhisan kang kansang balay layo og mga silingan gipangulbaan na sa kabalaka nga sila na usab ang atakehon sa ungo nga magpairing-iring.