VP Binay Makigkita kang Gov. Davide Kabahin sa ’93-1′ Nga Problema

Gihulagway ni Vice President Jejomar Binay nga hinay kaayo ang lakang sa mga opisyal sa Kapitolyo aron pagsulbad sa problema sa mga pamilya nga nagpuyo sa gitawag og 93-1 Lots.

Matud ni Binay nga ania pa sa Sugbo hangtod sa Sabado miingon nga kun makahigayon siya mahimo’ng iyang pakigkitaan si Gobernador Hilario Davide III aron pagsulbad sa mga problema.

Ang probinsya sa Sugbo adunay mga yuta nga nahimutang sa 11 ka barangay dinhi sa dakbayan nga gipuy-an sa mga informal settlers ug daghan pa kanila ang wala makabayad sa ilang obligasyon.

Ang uban sa mga yuta anaa mahimutang sa Lahug, Capitol Site, Busay, Luz, Tejero, Mabolo, Kalunasan, Apas, Lorega-San Miguel ug Camputhaw.

Matud ni Davide nga gipaninguha g’yud nila nga mapadali ang pagsulbad sa problema ug naglaum nga mahuman kini sa dili pa mapupos ang iyang termino pagka gobernador.

Ang nakapalangan sa pagbayad mao ang rason nga gimahalan ra ang mga hingtungdang pamilya sa presyo sa yuta nga maoy pabayran kanila sa mubo ra nga termino.

Si Binay miabot dinhi sa Sugbo kagahapon human niya yam-iri ang pagdapit kaniya sa Senate Blue Ribbon Committee nga nag-imbestigar sa giingong mga anomaliya nga gikalambigitan sa bise presidente.

Si Davide miingon nga angay g’yud unta nga si Binay miatubang sa mga senador aron matubag niya ang tanang pamasangil kabahin sa giingong overpricing sa pagtukod sa Makati City parking building ug ang pagpanag-iya niya og kapin sa 350 hektareyas nga kayutaan sa Rosario, Batangas nga wala madeklarar sa iyang kabtangan.

Apan si Binay miingon nga mag-usik-usik ra siya’s oras kun motambong sa imbestigasyon sa Senado nga ingon sa gihukman na siya’ng daan nga sad-an.

Sa iyang bahin, si Mayor Michael Rama miingon nga wala gayud mausab ang iyang pagsuporta kang Binay bisan pa sa mga pasangil kaniya kay wala pa kini mapamatud-i.

Gani si Rama miapas pa ni Binay nga miadto sa dakbayan sa Toledo kagahapon sa udto ug nakigtagbo ni Mayor Sonny Osmeña.

Si Binay miadto usab sa Aloguinsan ug nakigtagbo sa iyang mga lider.

Karong buntag, si Binay misuroy na usab sa Barangay Pasil ug Suba ug mikaon nga nagkinamot didto sa Taboan public market.

Image Credit: cebudailynews.inquirer.net