VSMMC Mi-order na’g 50 ka PPE Batok Ebola Virus

May 50 ka mga personal protective equipment (PPE) ang gi-order sa Vicente Sotto Memorial Medical Center (VSMMC) para sa mga kawani niini nga moatiman sa mga mataptan og Ebola virus.

Matud pa ni Dr.Antonio Roque Paradela, chief of clinics sa VSMMC nga tag P22 mil ang prisyo sa matag usa niini.

Kining PPE mao ang uniporme nga lubos puti nga senina uban ang karsones dala ang kawo ug sirado sa nawong nga maoy isul-ob sa mga doktor nga moatiman sa mga masakiton og Ebola.

Midugang si Paradela nga gihimo kini agi og pangandam bisan wala pay Ebola aron nga dili makalitan kun ugaling moabot man ang maong sakit dinhi sa rehiyon.

Giila ni Paradela ang Kimberly Clark Co. nga maoy eksklusibo nga supplier niini ug mao lamang ang bugtong nagpabrika sa maong uniporme.

Wala pa masayri ni Paradela kun kanus-a kini i-deliver kanila apan kun ugaling moabot ang maong uniporme, ipasul-ob kini sa mga doktor nga tahasan sa pag-atiman sa pasyente sa Ebola dinhi sa Central Visayas.

“Kun walay Ebola, aw dili usab kini ipasul-ob”, sumala ni Paradela.

Sa pagkakaron nagpabilin pa nga Ebola free ang rehiyon 7, apan gipangandaman pag-ayo kini sa mga tinugyanan sa panglawas aron kalikayan ang maong sakit nga makamatay.

Matud pa ni Paradela nga modako gayud ang gasto sa kagamhanan kun pananglit may masakiton og Ebola dinhi sa nasud kay sa uniporme pa lamang, kausa ra kini gamita ug inighuman huboon dayon ug ilabay.

Gani problema pa nila karon ang labayanan niini kay dili kini ikasagol sa mga ordinaryong basurahan sa palibot tungod sa mananakod nga sakit sa pasyenteng atimanon sa mosul-ob niini.

Busa gitun-an pa nila karon ang lugar nga angay labayan niini o kaha posibling sunogon lang kini dayon human og gamit.

Gawas sa PPE, padayon gihapong gilakip sa mga pagbansay ang pag-andam og mga tambal batok sa matag simtoma sa Ebola.

Simtoma

Tungod kay ang simtoma niini mao ang hilanat, sip-on, ubo, kalibanga, ug suka-suka, ang mga paracetamol nga produkto para niining sakita idapat dayon sa pasyente, sumala ni Paradela.

Sa nasayran, walay nadiskobrehang tambal ang Ebola ug gani nasuta nga kutob ra sa 21 diyas ang tagal sa tawo nga mataptan sa maong sakit, mamatay na.

“Busa kun may giandam man nga tambal ang mga lokal nga mananambal, wala kini kasigurohan nga makasanta sa sakit nga Ebola”, sumala pa ni Paradela.

Image Credit: www.tumblr.com