Mayor Rama, Senyor Na

Si Cebu City Mayor Michael ‘Mike’ Rama mitangkod na sa 60-anyos ug kuwalipikado na siya nga makadawat og cash assistance gikan sa dakbayan alang sa mga senior citizens, apan ang mayor mitataw nga mentras may kuwarta pa siya, dili siya mo-apply sa mao’ng hinabang-salapi.

Mitangkod na nga 60-anyos si Mayor Rama kaniadto’ng Martes dungan sa pagsaulog niya sa iyang adlaw’ng natawhan.

Ang kanhi mayor nga si Tomas R. Osmeña apil ang iyang asawa nga si Konsehal Margarita “Margot” Osmeña nga pareho na usab nga senior citizens, wala usab mokobra og cash assistance alang sa mga senior citizens.

Lahi ni Kanhi Mayor Alvin Garcia nga mikobra g’yud sa mao nga cash assistance gikan sa dakbayan sa Sugbo. Matud ni Mayor Rama nga samtang may kuwarta pa siya dili siya mokobra sa mao nga cash assistance.

Karong tuiga, ang mga senior citizens gipagahinan sa Cebu City Council og P720 milyones aron bahin-bahinon sa mga 60,000 ka tiguwang nga rehestrado sa Office of Senior Citizens Affairs (OSCA).

Atol sa kampanya sa eleksyon, ang matag senior citizens gipasaligan ni Mayor Rama nga hatagan niya og ‘tag P12 mil nga cash assistance karong tuiga apan miabot pa lang og P7 mil ang nahatag sa City Hall gikan kaniadto’ng Enero tungod sa kakuwang og kuwarta sa dakbayan.