DOLE Nagtinguha nga “Child Labor-Free” ang mga Brgy. sa 2016

Gitinguha sa kagamhanan nga ika-deklarar nga “child labor-free” ang kapin sa 400 ka barangay sa nasud sa tuig 2016.

Wala pa hinuon ikabutyag sa departamento sa pamuo ang ngalan sa maong mga barangay, apan nasinati nila ang kadaghang mga bata nga nanarbaho na ubos sa linghod nga edad ubos sa pagtugot sa mga ginikanan.

Sumala ni Kalihim Rosalinda Baldoz sa Department of Labor and Employment (DOLE), nga ipadayon pagpatuman sa ilang ahensiya ang Anti-Child Labor Program.

Kini pinaagi sa paghatag og nagkalainlaing paagi sa panginabuhian sa mga ginikanan sa mga batang nagtrabaho na.

Miingon si Baldoz nga dili angay manarbaho ang mga kabataan kay ang ilang misyon mao ang pagpalambo sa ilang edukasyon.

Busa sa mga linghod pa og edad nga mga bata, ubos sa 18 anyos ang panuigon, angay pa sila nga anaa sa eskuylahan matag adlaw ug dili kay sa trabahoan aron manginabuhi.

Gawas niini, midugang si Baldoz nga padayon nilang panid-an ang mga benepisyaryo sa Conditional Cash Transfer Program (CCTP) aron masiguro nga wala nay kabataan nga nagtrabaho, kundili anaa sila sa ilang pag-eskuyla.