DOH7: 64 Porsento Nabakunahan Batok Tipdas

Ang Department of Health (DOH)7 mibutyag niadtong Biyernes nga mikabat pa sa 64 porsento ang ilang nabakunahan sa sakit nga tipdas, ug susama usab niining maong gidaghanon ang nabakunahan batok polio dinhi sa Central Visayas.

Matud pa ni DOH7 Regional Director Jaime S. Bernadas nga kutob nalang sa Martes ang kampanya sa pagpamakuna batok tipdas ug polio ug paningkamotan nila nga makaabot og 95 porsento ang ilang mabakunahan hangtud sa adlawng Martes, Septembre 30, 2014.

Gitumbok ni Bernadas nga walay puas sa tanang adlaw mosaka sa kabalayan ang mga barangay health workers aron mamakuna sa mga bata nga may edad 5 anyos paubos.

Matud pa ni Bernadas nga pipila sa hinungdan nga gamay ra ang ilang nabakunahan sukad niadong Septembre 1 hangtud niadtong Huwebes, Septembre 25, mao ang bagyo, kanunay nga pag-uwan, mga kagubot didto sa Negros Oriental ug kalisud sa panginabuhi.

Hinungdan nga sa buntag bukas ang mga barangay health center sa pagpaabot sa mga ginikananan nga magdala sa ilang mga anak nga bakunahanan.

Apan inigkahapon, manaka-saka sa kabalayan ang mga barangay health workers aron mamakuna sa ilang target.

Ang DOH may katibuk-ang target nga bakunahanan sa tipdas nga 840 mil kapin, samtang kapin usab nga 986 mil ang bakunahanan sa polio.

Hinuon, gipasalig ni Bernadas nga paningkamotan nilang makaabot og 90-95 porsento ang mabakunahan nila hangtud Septembre 30.

May extension usab ang maong pamakuna sa Oktobre ug Nobyembre sa aron mabakunahanan kadtong wala mabakunahi ning buwan sa Septembre.