Kapin P200 Milyones, Isugyot sa Konseho

Kapin lang sa P200 milyones ang 2nd Supplemental Budget sa dakbayan sa Sugbo nga isugyot sa Committee on Budget and Finance nga paaprobahan sa Cebu City Council.

Si Konsehal Margarita “Margot” Osmeña mipasabot nga nauyonan nila sa mga konsehal nga tangtangon lang ang gisugyot nga badget nga kantidad usab og kapin sa P200 milyones.

Ang rason nga dili maaprobahan sa City Council ang gisugyot nga kapin sa P500 milyones nga supplemental budget mao nga ang gipangayo nga budget sa Local Finance Committee ni Mayor Michael Rama wala kini kasuportahi og “actual funds.”

Gipasabot ni Konsehal Osmeña nga daghang mga proyekto nga kantidad og dul-an sa P200 milyones nga gisuportahan lang og “Unappropriated Funds” diha sa Annual Budget para karong tuiga.

Nagpasabot kini nga ang pundo sa budget karong tuiga nga wala pa mapatuman ug maoy giingon nga gamiton sa Local Finance Committee nga isuporta sa supplemental budget.

Matud ni Konsehal Osmeña nga gipatawag niya ang ubang mga konsehal, apil gani ang mga konsehal nga alyado sa Team Rama ug ang Independent Bloc aron makahatag sila sa ilang baruganan.

Bisan si Konsehal Nendell Hanz Abella, usa ka abogado ug alyado sa Team Rama miingon nga gisuportahan niya ang lakang nga dili aprobahan ang proyekto kun walay klaro nga budget.

Ang lagda nagmando nga ang supplemental budget kinahanglan nga suportahan g’yud og “actual funds” samtang ang Annual Budget mahimo ra nga suportahan og projected income sa usa ka ahensya sa kagamhanan.

Gitataw ni Konsehal Osmeña nga ang wala na iapil sa Supplemental Budget mao ang mga infrastructure projects nga gisugyot apan walay klaro nga budget.

Base sa balaod, ang Annual Budget kinahanglang iduso sa konseho sa dili pa molapas ang Oktobre 16.

Adunay mga report nga ang administrasyon ni Mayor Rama mosugyot og P35 Bilyones nga budget para sa dakbayan sa Sugbo karong sunod tuig.