Contact Center Unit Tukoron sa SSS Alang sa Mga OFWs

Gitakdang ilusad sa Social Security System (SSS) karong umaabot nga Oktobre ang contact center unit (CCU) alang sa mga Overseas Filipino Worker (OFW).

Nasayran gikan kang SSS Senior Vice President ug Internal Operations Division head Judy Frances See nga naningkamot ang SSS nga labing mapauswag ang ilang serbisyo alang sa mga trabahante sa gawas sa nasud.

Matud pa ni See nga nakadesider sila sa pagtukod sa CCU gumikan sa nasayran nila nga daghang mga pamilya sa OFW nga dili makakontak sa OFW gumikan sa pagkakuwang sa mga sentro nga sama sa CCU.

Miingon si See nga daghan sa mga OFW nga may mga pangutana bahin sa ilang pagka-membro sa SSS ug sa uban pang mga serbisyo nga idulot niini kanila apan walay makatubag sa ilang mga pakisusi.

Kun matukod na kining CCU dili na maglisud ang mga OFW sa pagpasupot sa ilang mga pakisayud bahin sa mga benepisyo nila nga madawat sa ilang pagpasakop sa SSS.

Midugang si See nga ang CCU maoy motubag sa mga pangutana sa OFW pinaagi sa email o kaha pinaagi sa long distance call.

Nagkanayon si See nga ang CCU bukas gikan sa alas 6:00 sa buntag hangtud sa alas 10:00 sa gabii gikan sa adlawng Lunes hangtud Biyernes ug sa dili madugay himoon na kining kada adlaw. Samtang gipahibawo usab ni See ang service hotline sa CCU nga mao ang (02) 364-7796 ug (02) 374-7798 samtang ang e-mail address niini mao ang ofw.relations@sss.gov.ph.

Alang kang See may plano usab ang SSS nga magtukod og international toll-free numbers aron makatawag nga walay bayad ang mga OFW diin sa samang higayon pahigayonan usab kini og online contact points ug instant messaging platforms.

Matud nmi See nga base sa listahan sa SSS sa miaging Hunyo 2014, mokabat na sa 983,262 ka mga OFW ang iyang mga sakop nga gialagaran didto sa gawas sa nasud.